By PR | 08:48 PM October 24, 2023
Malampuson ang gihigayon nga unang torneyo sa arnis nga gipaluyohan ni Sen. Migz Zubiri nga giduwa sa lungsod sa Antequera.
Gisalmutan sa mga batan-ong atleta gikan sa ubang dapit sa nasud, ang torneyo gidumala sa Philippine Eskrima Kali Arnis Federation (Pekaf).
Gibansagan kini nga First Pekaf-Bohol Sen. Migz Zubiri Cup Arnis Regional Invitational Championship.
Gisalmutan kini sa 13 ka mga koponan gikan sa lain-laing rehiyon sama sa Arnis De Caballes sa Ormoc City, Magsico National High School sa Sugbo, Makati Arnis Team, MSU sa ILigan uban sa Baquero Eskrima Arnis, Saubay sa Pinuti Tagbilaran, Lamdag Eskrima Cebu, Eskrido Durex Trinidad, Buenavista Community College, Bohol International College-Tagbilaran, Tagbilaran City, EGC Arnis Combat Bohol ug LGU LoonTeam.
Malampuson nga nagsinukliay og abilidad ang 168 ka mga partisipante sa torneyo nga gihimo Oktubre 16-20.
Nakab-ot sa Ormoc City-Arnis de Caballes ang kampyonato samtang nakuha sa EGC Arnis Combat Bohol sa Antequera ang ikaduhang pwesto.
Sa ikatulong pwesto naangkon sa Lamdag Eskrima Cebu.
Matud sa mga tigpasiugda, kasamtangang anaa sila sa pagpangandam aron makasulod ang ilang gibansay nga kabatan-onan ngadto sa Batang Pinoy ug mga paduwa sa nasudnong mga bugno.
Adunay gigahin nga P5 milyones alang sa paugnat sa kusog alang sa sunod tuig.
Kini alang sa dugang pagpalambo sa maong programa diin tipik nga bahin niini alang sa duwa nga arnis.
Sa laing bahin, mapasalamaton si Aumentado sa tanan nga nisuporta sa programa sa mga duwa sa basketball, arnis og uban isip kay kabahin sa kinatibuk-ang kalambuan sa lalawigan sa Bohol. (ALT/PIMO)
