By PR | 06:44 PM October 19, 2023
Gipahigayon sa Department of Tourism (DOT) sa Central Visayas ang usa ka familiarization seminar alang sa mga tour guides sa lalawigan kabahin sa geotourism subay sa pag-ila sa Bohol isip UNESCO Global Geopark.
Ubos sa temang “Continuing Education for Tour Guides”, mokabat sa 29 ka tawo ang nisalmot sa maong kalihukan, sa maong kalihukan nga gipahigayon niadtong Oktubre 18, sa Belian Hotel sa dakbayan sa Tagbilaran.
Matud pa sa DOT-7, tumong niini ang pagmugna og dugang kasayuran sa mga tourism stakeholder kabahin sa konsepto sa Global Geopark ug ngano nga ang Bohol gihatagn sa maong titulo sa UNESCO.
Gihatagan og impormasyon aron mapun-an ang kahibalo sa mga nanambong sa tigum kabahin sa geoscience ug pagkat-on sa tukma ug siyentipikanhong impormasyon aron sayon nila ang pagpasabot sa mga turista nga mobisita sa lalawigan nga moduaw sa nagkalain-laing mga geosite.
Gidapit sa DOT si Karl Michael Din, ang resident geologist UNESCO Global Geopark ingon man ang iyang team sa Bohol sa pagsaysay sa panaw sa Bohol aron maangkon ang talagsaong proklamasyon sa UNESCO.
Kabahin usab ang paghatag og giya sa 17 ka geosites, 16 ka kultural, ug upat ka biological sites nga sakop sa Geopark.
Gipasabut ni Din ang kamahinungdanon sa pag-edukar sa katawhan bahin sa konsepto sa Geopark ug ang tumong niini sa pagpalawom sa pagsabot sa geoheritage conservation, sustainable tourism, ug edukasyon.
Gihatagan usab og higayon ang mga nanambong nga mangutana bahin sa topograpiya ug kadagatan sa Bohol atol sa interactive discussion.
Nanghinaut ang DOT-7 nga pinaagi sa seminar, ang mga local tour operator makabaton ug hiniusang kahibalo bahin sa Geopark aron mahatagan usab ang hustong kasayuran ang mga turistang buot makat-on kabahin sa geology sa lalawigan.
Gihimo sa ikaduhang adlaw sa seminar niadtong Oktubre 17-18 lakip ang ubang hisgutanan sa mga balaod sa pagpanalipod ug pagpreserba sa tarsier sanctuaries pinaagi sa Department of Environment and Natural Resources- Provincial Environment and Natural Resources Office Bohol.
Gituki usab sa Bohol Provincial Tourism Office ang mga kalambuan sa lokal nga industriya sa turismo pinasubay sa tumong sa kagamhanang probinsya nga makabaton og kausaban sa industriya sa turismo.
Kini mao ang pagbag-o sa panlantaw gikan sa mass tourism ngadto na sa turismo nga malungtaron ug nagpakabana sa kinaiyahan. (PIMO/GMC)
