By PR | 06:52 PM October 19, 2023
Duha ka atletang Bol-anon ang mosalmot sa himoong weekly relay finals sa Philippine Amateur Track and Field Association (Pata) ning katapusan sa Oktubre.
Makigsangka sa mga banggiitang atleta sa nasud mao ang mga sumusubang sa natad sa lumbag dagan sila si Liznie Delfino sa lungsod sa Baclayon ug Ma. Emilie Balunan sa Garcia-Hernandez.
Gilukdo sa duha ang paglaom sa lalawigan sa himoong mga lumba karong Oktubre 28-29 sa PhilSports Arena sa Pasig.
Parehong entrante sa under-18 category and duha ka atleta diin si Delfino makig-indigay sa 2,000-meter steeple chase samtang si Balunan makiglumba sa 800-meter run.
Di na bag-o sa duha nga makigsangka sa nag-unang mga atleta sa nanglabay nga mga nasudnon ug rehiyonal nga mga kompetisyon. Ubos sa bandera sa Bohol, pareho na kining nakaangkon sa kadaugan sa tagsa-tagsa nila ka duwa.
Karong tuiga, nahipos ni Delfino ang tulo ka bulawang medalya ug usa ka pilak sa CVIRAA nga gipahigayon sa Carcar City, Cebu, samtang si Balunan mipauli nga og upat ka bulawan.
Giproklamar usab sila isip overall champion sa athletics secondary girls category atol sa maong kompetisyon.
Karon suwayan sa duha ka Bol-anong atleta nga masukip sa ASEAN youth ranking, diin sila dunay kahigayonan nga makarepresentar sa Pilipinas sa mga kompetisyon sa gawas sa nasud. (PIMO/GMC)
