By PR | 06:17 PM October 10, 2023
Nakadawat og mga bala, magazine, armas ug ubang mga ekipo ang Bohol Provincial Police Office (BPPO) aron gamiton sa nagpadayong kampanya alang sa pagpatunhay sa kahusay ug kalinaw sa lalawigan sa Bohol.
Kini nadawat isip kabahin sa programa sa Philippine National Police are pagsangkap sa kapulisan sa mga kagamitan ug kahimanan.
Si Police Brigadier General Anthony Aberin, hepe sa Police Regional Office (PRO) 7, personal nga miduaw sa Camp Francisco Dagohoy alang itunol ang pagtugyan sa maong mga kagamitan.
Lakip na niini ang 1,000 ka 5.56 magazine, 4,000 rounds sa 9mm CTG Ball, 3,300 rounds sa 5.56mm Bala ug 50 ka mga raincoats o poncho.
Nagpadayag sa iyang kalipay si Police Col. Lorenzo Batuan, hepe sa BPPO, sa nadawat nga mga kagamitan.
Dugang pa niya, daku kini kaayog ikatabang sa mga otoridad sa pagpatunhay sa seguridad sa lalawigan.
Sa pikas bahin, gipasidan-an ni Aberin ang mga sakop sa kapulisan nga magpabiling neutral o way dapigan sa umaabot nga piniliay alang sa Sangguniang Kabataan ug Sangguniang Barangay.
Gipahinumduman usab ni Aberin ang mga tinugyanan nga di magbinuang sa ilang trabaho aron nga di maproblema sa ilang pagpanerbisyo. (PIMO/AEST)
