By PR | 09:11 PM October 03, 2023
Miduyog ang lalawigan sa Bohol sa kasaulogan sa buwan sa kooperatiba nga gibuksan sa usa ka programa sa Ceremonial Hall sa New Capitol Building niadtong Oktubre 2.
Mitambong sa maong kalihukan sila sa Bise Gobernador Dionisio Victor Balite, bokal Lucille Lagunay, Mayor Jane Yap sa dakbayan sa Tagbilaran, Oscar Valles, chief of staff for external affairs isip representante ni Gov. Aris Aumentado, ug Ma. Conrada Fuentes sa Provincial Cooperative Development Office (PCDO).
Ubos sa tema nga “Cooperatives: Pioneering the Path to Recovery Amidst the Modern Challenges of Climate Change and Food Security”, ang programa gitambongan sa 34 ka mga kooperatiba.
Tinguha sa maong kalihukan ang pag-umol og mga kooperatiba nga molahutay taliwala sa mga kalamidad ingon man ang mabungahon nga paningkamot alang sa food security.
Ang ikaupat nga hugna sa kalihukan mao ang trade showcase ribbon cutting sa CPG Park diin 16 ka mga exhibitors ang nagpasundayag sa ilang mga produkto. Ang maong showcase himoon hangtud sa Oktubre 13.
Sa laing bahin, ang Bohol Dairy Cooperative (BODACO) sa lungsod sa Ubay nga lakip sa miduyog sa maong kalihukan nagpadayon sa pagpahigayon sa milk production ug milky bun production sud na sa lima ka tuig.
Nasayran nga ang BODACO gialagaran sa 33 ka mga sakop nga nakabaton og disenteng trabaho nga nagdawat og minimum nga sweldo samtang laing 20 ang on call sa pagkakaron.
Ang BODACO usa sa mga regular nga supplier og gatas sa kagamhanang probinsyal alang sa mga Day Care ug mga nagtungha sa elementarya.
Gawas sa BODACO, lakip sa 16 ka mga kooperatiba ang Matin-ao Vegetable Growers Organization sa Sierra-Bullones, Livelihood Upland Management Agricultural Enterprise Development MPC sa Duero Calinginan Norte MPC sa Sevilla, Mantacida United Farmers MPC sa Catigbian, Tubigon Loomweavers MPC, Jagna Calamay Producers Cooperative, Buon Pastore Agriculture Cooperative sa Loboc.
Bohol Transport Cooperative sa Tagbilaran, Sto. Rosario Bamboo Craft Makers Producers Cooperative, Antequera; Basketry United Craftsmen of Antequera for Generations, Antequera; Canlaas Women Weavers Organization, Antequera; Abante Bohol Cooperative, Balilihan; Bohol Community MPC, Loay; Poblacion Norte, Bicao, Katipunan, Guadalupe, Buenavista Cooperative, Carmen; ug Medical Mission Group Hospital and Health Services Cooperative.
Gipadangat ni Gov. Aris Aumentado ang iyang pahalipay ug pasalamat sa kontribusyon sa mga kooperatiba sa kalambuan sa Bohol.
Giawhag usab Niya nga suportahan ang trade showcase sa mga kooperatiba ingon man sa ilang mga produkto.
Ang kasaulogan base sa Republic Act No. 1150 “An Act Declaring the Month of October of Every Year as the National Cooperative Month.” (PIMO/ALT)
