WATCH: Gob. Aris gibaktas ang 5 km para mabisita ang haya sa rebelde nga napatay sa Bilar; naghangyo sa mga rebelde nga mubalik na sa sabakan sa balaod

By Marisol Bo-oc | 11:44 AM September 10, 2023

Gibisita usab ni Bohol Gov. Aris Aumentado ang haya sa usa sa napatay sa engkwentro sa Bilar sa usa ka hilit nga barangay sa lungsod sa Mabini, kagabii, Sept. 9.

Sa lalom nga kagabhion, gibaktas ni Aumentado ang 5 km para mabisita ang haya ni Lucio Esagre, 45 anyos, sa lungsod sa Mabini, Bohol ug mapadangat ang iyang kinasingkasing nga pahasubo sa pamilya ni Esagre.

Matud pa ni Aumentado nga nibiya si Esagre sa iyang pamilya 22 ka tuig na ang nilabay ug mipauli siya karon nga gisulod na sa lungon.

“Unta kung naminaw pa sila sa akong panawagan pagsurrender, dili unta kini mahitabo,” matud pa sa batan-ong gobernador.

“Dili ko gusto nga adunay Bol-anon musinati sa ingon ani nga sitwasyon. Ako nagatuo nga bisan unsa ka lawm ang atong pagkahiubos sa gobyerno mahimo kini nato nga lingkuran ug pangitaan sa solusyon. Kay bisan anus-a dili solusyon sa problema ang laing problema, ” matud pa ni Aumentado.

Nag-awhag si Aumentado nga mubalik na sila sa sabakan sa balaod.

” Mao man nga sa gihapon ako nagahangyo tungod og alang sa inyong mga pamilya, mas makaayo nga mubalik na kamo sa atong pangagamhanan samtang dili pa uwahi ang tanan,” matud ni Aumentado.

“Kay ako isip inyong Gobernador, nagapaningkamot sa kaayuhan natong tanang mga Bol- anon,” panapos ni Aumentado.

Si Esagre usa sa napatay sa
engkwentro sa Sitio Ilaud sa barangay Campagao, Bilar, Bohol.

Leave a Reply

%d bloggers like this: