By Rey Anthony Chiu/PIA-Bohol | 11:14 AM September 08, 2023
Gisaad ni Bise Presidente Sara Zimmerman Duterte ngadto sa mga magtutudlo nga magpahimutang sa Department of Education (DEPED) website og online chat legal assistance service nga dumalahon sa mga abogado aron may kapangutan-an ang mga magtutudlo sa ilang mga suliran samtang nagtudlo.
Kini nga katikaran, gihangop usab sa mga 2,000 ka mga magtutudlo ug administrador sa mga pangpubliko nga tunghaan sa tulo ka rehiyon nga ming-anhi sa Bohol aron pagtambong sa nasudnong kick-off activity sa National Teachers’ Month 2023 didto sa Bohol Wisdom School Gymnasium.
Ang mga magtutudlo, maoy kasagaran nga mabiktima sa mga legal nga suliran gikan sa kakuwang sa financial literacy ngadto na sa mga pagdisiplina sa mga tinun-an ug sa mga suliran nga maka-apekto sa mga magtutudlo sa pagka epektibo sa ilang trabaho.
Gawas niana, gibutyag usab sa Bise Presidente kinsa mao usab ang kalihim sa DepED, nga iya na nga patangtangan sa mga administratibo nga mga trabahoon ang mga magtutudlo aron kini makatutok na sa ilang trabaho sa pagtudlo ug dili sa pagbuhat sa mga buhatonon nga nakabalda sa ilang misyon sa pagpakat-on sa mga kabataan.
Una na nga gireklamo sa mga maestro ang mga kanhi trabahoon nga gisangon kanila nga dagway ug wala nay labut sa ilang pagkamaestra sama sa pagpurga sa mga bata, pagluto alang sa nutritional ug supplemental feeding.
Sa diha nga iyang gipasusi, matud sa anak sa kanhi Presidente nga karon mao na ang ikaduhang labing taas nga opisyal sa nasud nga ming-abut sa 56 ka administrative tasks ang gibuhat sa mga magtutudlo nga wala nay labut sa ilang trabaho.
Matud sa babaye nga Duterte, iya na nga gipasubay sa iya nga mga sinaligan ang gitaho nga mga dugang sa trabaho aron matangtang na ang mga trabaho nga gisangon nga walay nagpaluyo nga mandu sa balaod.
Tungod niini, gikan sa 56 ka administrative tasks, 11 na lang karon ang mga trabaho nga mahilakip sa mga gisangon sa mga magtutudlo.
Niini usab, gipadayag sa bise presidente nga mobukas ang DepED sa 3500 ka posisyon alang sa Administrative Officers ug lain pa nga 1,500 ka posisyon alang sa Planning and Development Officers (PDOs) aron maluag-luagan ang mga suliran sa mga magtutudlo ug makuhaan salia sa bug-at nga trabahoon ug makatutok na sa pagtudlo. (PIA-7/Bohol)
