By PR |08:22 AM July 20, 2023
Gipahigayon ni Gobernador Aris Aumentado niadtong Hulyo 17, 2023 didto sa iyang buhatan ang ceremonial turn-over sa bereavement assistance gikan sa Kagamhanang Probinsyal nga nagkantidad og P5,000.
Adunay 73 ka mga claimant ang miadto sa Kapitolyo partikular sa Constituency Services Section (CSS) aron sa pagdawat sa ilang ayuda pinaagi sa pagpahiluna ni Executive Assistant Jun Flores.
Si Chief of Staff for External Affairs Oscar Valles nagkanayon, nga ang mga Bol-anon nga nahitabuan sugod niadtong buwan sa Enero 2022, hangtod ning maong tuig 2023, mao ang kwalipikado nga makadawat kung ilang natuman ang mga rekesito sama sa death certificate ug barangay certificate of residency ug gisubmitar kini ngadto sa CSS. Ang maong mga rekesito gikinahanglan nga masubmitar sulod sa 40 ka adlaw sa kamatayon sa hingtungdan.
Adunay 100 ka mga claimant ang naaprobahan nga pagahatagan sa maong ayuda ning unang hugna sa pagpanghatag.
Ang maong Bereavement Assistance subay sa naaprobahan nga Provincial Ordinance No. 2023-003 diin adunay titulo nga “Institutionalizing the Bereavement Assistance Program of the Province of Bohol.” (PIMO)
