By J. Jala | 12:59 AM April 18, 2023
Usa ang patay samtang usa ang samdan sa nahitabong tulis sa usa ka gasoline station sa lungsod sa Ubay kagahapon, Abril 17.
Nahitabo ang pagpanulis og pagpamusil sa Sailor Oil Gasoline Station nga naka base sa Barangay San Pascual.
Patay on-the-spot ang giilang si Marlowie Jayoma Amparado, 29 anyos ug taga Brgy. Trinidad, Guindulman.
Si Amparado usa ka escort sa kolektor sa maong gasolinahan.
Samtang samaran usab sa tudlo tungod sa agi sa pinusilan ang iyahang kauban nga giilang gwardya nga si Pastor Troniba Jr.
Nikabat og P300k ang nadala sa mga tulisan.
Sa CCTV Footage, makita nga ang suspek kalit lang mingduol kang Amparado ug walay duha-duhang gipusil kini. Mingsulod kini opisina og gikuha ang kuwarta. Dali-dali kining mingsakay sa naghuwat nga motor.
Padayun ang gihimong imbestigasyon sa kapulisan.
