By PR | 11:40 PM February 21, 2023
Si Department of Agrariam Reform (DAR)Secretary Conrado M. Estrella III mao ang keynote speaker sa gipahigayon nga Distribution of E-Title/ Certificate of Land Ownership Award (CLOA) karung adlawa, Pebrero 21, didto sa Bohol Cultural Center.
Simultaneous ang maong kalihukan uban sa Dumaguete City, Negros Oriental ug Cebu City nga nagapahigayon usab og pagpanghatag sa titulo ngadto sa mga benepisyaryo.
Sa Bohol, adunay 595 ka mga titulo ang gipanghatag ngadto sa 491 ka mga Agrarian Reform Beneficiaries gikan sa 18 ka mga munisipalidad sa probinsya nga milangkob og 494.9568 ka ektarya.
Si Ronald Pumatong, provincial Agrarian Reform Program officer II, miabi-abi sa mga mitambong sa kalihukan.
Ang Director sa DAR Region VII Leomides Villareal maoy mihimo sa inabrihang mensahe.
Si Gobernador Aris Aumentado usab miabi-abi sa tanan nga mitambong sa kalihukan, mga kadagkuan ug ilabina ang mga mag-uuma. Midasig ang gobernador ngadto sa mga mag-uuma nga ampingan ang mga nadawat nga kaayuhan gikan sa gobyerno.
Mipasalamat usab si Aumentado sa secretary nga kanhi congressman usab.
Matud pa ni Aumentado nga ang pag-apod-apod sa CLOA/e-title ug pag-turnover sa mga makinarya sa panguma usa na usab ka lig-on nga pamatuod nga ang atong mga kaubang Boholano nag-ani gihapon sa kaayohan sa repormang agraryo.
“Sukad sa pagsugod sa programa daghang tuig na ang milabay, nakatampo kini sa pagpauswag sa kinabuhi sa mga benepisyaryo niini ug pag-umol sa mas maayong komunidad sa tibuok nasud,” matod ni Aumentado sa iyang mensahe.
Matod niya sa Bohol, ang repormang agraryo nagdala og kalamboan.
“Karon nga ang panggamhanan sa Probinsiya nag-una sa agrikultura aron makab-ot ang food self-sufficiency ug kinatibuk-ang pag-uswag, ang mga programa nga sama niini nahimong mas importante kaysa kaniadto,” matod ni Aumentado.
Samtang ang kanhi San Miguel mayor ug karon DAR Assistant Secretary, Atty. Virgilio Mendez maoy mipaila-ila sa DAR Secretary ngadto sa tanan.
Gihangyo ni Estrella ang mga nakadawat nga dili ibaligya ang ilang yuta.
Iya usab gipahibalo nga hapit na maaprobahan sa Senado ang New Emancipation Act nga gi- file ni Sen. Imee Marcos ug kung mahimo kini nga balaod,ang gipanghatag karon nga titulo dili na pagabayaran sa mga benepisyaryo ngadto sa bangko. Iyang pagdugang nga kini ubos usab sa pagtambayayong sa tulo ka kongresista- Edgar Chatto, Vanvan Aumentado ug Alexie Tutor.
Mahinumduman nga ang mga titulo nga giapod-apod karon, gibayaran na sa gobyerno ngadto sa Landbank ug ang mga ARB magabayad ngadto sa Landbank sa ubos nga kantidad sulod sa daghang mga tuig.
Gisunod usab ang turnover of farm machineries pagkahuman sa pagpanghatag sa mga titulo. Nakadawat mao ang Cagawasan CARP Farmer Beneficiary sa Barangay Cagawasan in Dagohoy town ug Bulilis Agrarian Reform Communities Cooperative (formerly Bulilis Multi-Purpose Cooperative) sa Barangay Bulilis sa lungsod sa Ubay.