By Rey Anthony Chiu | 01:33 PM February 15, 2023
Upat na lang ka aktibong kaso sa coronavirus disease (Covid-19) sa Bohol, segun pa sa mga tinugyanan sa Emergency Operations Center, nga nagbase sa Bohol Inter-Agency task Force on the Management of Emerging Infectious Diseases (EOC-BIATF) base sa Provincial Health Office.
Kini samtang nakaabut na sa 736 ka Bol-anon ang natakbuyan sa tuig sa sakit nga makamatay ang nahunosan gayud sa kinabuhi tungod sa bantugang sakit sukad kini namatikdan nga mingsulod sa lalawigan niadtong Marso 2020.
Kini nga kadaghanon sa namatay, napun-an lamang og 104 ka kaso, subay sa nataho niadtong Pebrero 12 sa miaging tuig nga may 632 ka kaso.
Ang mga aktibong kaso naa sa Panglao, Dauis, Alburquerque ug Clarin, segun sa taho iadtong Pebrero 14.
Apan bisan pa kon 4 na lang ka aktibong kaso sa Covid ang ania sa Bohol, okupado pa gihapon ang nag-unang tambalanan dinhi nga gitagana alang sa pagtambal sa nahisgutang grabe ka mananakod nga sakit.
Sa taho sa EOC sa BIATF, puno pa gihapon ang 7 ka Covid Intensive Care Unit beds, 6 ka Covid isolation beds ug 43 ka Covid ward beds sa GOv Celestino Gallares Memorial Hospital sa Tagbilaran.
Sa 18 ka Covid mechanical ventilators sa nahisgutang tambalanan, 11 niini ang gigamit sa kasamtanagan ug 7 lang ang bakante.
Gani, sa mga katre nga dili sa pangCovid, awas gihapon ang nahisgutang tambalanan.
Puno ang 44 ka Non Covid ICU beds niini ug usab ang 228 ka Non-ICU nga mga katre nga gitagana niadtong mga pasyente nga naadmit dili tungod sa Covid.
Ang GCGMH maoy bugtong tertiary hospital nga gipanag-iya sa nasudnong kagamhanan, ug ania dinhi sa Bohol.
Sa mga pangpublikong tambalanan, usa na loang sa 11 ka Covid Isolation beds ang bakante sa Cong Simeon Toribio Hospital sa Carmen, walay bakante sa Covid ICU beds sa Don Emilio del Valle Memorial Hospital sa Ubay, 9 sa 40 ka katre na lang usab ang magamit isip Covid Isolation beds, ug wla nay mechanical ventilator nga magamit didto.
Niini, padayon nga nanawagan ang mga tinugyanan sa kasanihan, ug mga opisyales sa Bohol nga kon mahimo, likayan pa gihapn ang mga tapoktapok ilabi na kon sirado ug walay maayong bentilasyon, ug sa kanunay, mogamit sa face mask alang sa kaugalingon nga proteksyon. (PIA-7/Bohol)
