By Ric Obedencio | 10:16 PM January 30, 2023
Walay relihiyon’g mahimong babag sa paghiusa, si Bise-Gob. Dionisio Victor Balite nagkanayon sa iyang pakigpulong atol sa Bohol Stakeholders’ Fellowship sa pagsaulog sa National Bible Month didto gihimo sa Ceremonial Hall, New Capitol Building, Tagbilaran City karung adlawa.
“Atong gisaulog ang National Bible Month. Gipangulahan kini sa atong Provincial Capitol. Gisalmutan kini sa nagkada-iyang mga Relihiyon sa atong probinsya. Kini nagpasabot nga bisan unsa pa ang atong relihiyon nga dili kani babag sa atong panaghiusa aron kita mo Abante sa atong pag-asenso,” matud ni Balite.
Ang kalihokan gilusad usab sa ubang mga lungsod diin gisalmotan sa provincial officials pinangulohan nil ani Gob. Aris Aumentado, B-Gob. Balite ug ubang mga opisyal sa kalungsuran.
Samtang sa laing kalamboan, si Balite milusad sa programang pangkalikopan. Matud niya “Ang atong Office of the Vice Governor (VGO) nagmugna ug usa ka project nga nagatutok sa kaayohan sa atong kinaiyahan.”
Kini nga kalihokan mao ng pagpananum og kahoy sa lungsod sa Carmen, din nahimutang ang BIT -IC nga tunghaan gipanag-iyahan sa pamilyang Balite.
Siya midugang, “Parte sa akong Birthday Celebration mao ang pagtanom isip paghatag ug balik sa kinaiyahan sa tanan niyang mga kaayo nga nahatag sa akoa.”
Ug si Balite nagpasalamat, “Akong dakong pasalamat sa akong mga kauban sa VGO ug ubang mga ahensiya sa gobyerno sa ilang pag-apil sa maong project para sa kinaiyahan.” (rvo)