By Rey Anthony Chiu | 09:04 PM January 27, 2023
Isibug sa sunod adlaw, ipasabut sa Domingo na, inay sa Sabado ang naschedule na nga power interruption nga makaapekto sa bagang kalungsuran sa Bohol.
Segun sa labing bag-o nga advisory nga gipagawas ni National Grid Corporation of the Philippines Senior District Engineer, Engr. Giuseppe R Lomaad, ilang gisibug ang schedule sa power blackout sa Bohol ngadto sa Domingo, Enero 29, isip paghatag og konsiderasyon sa hangyo sa Kapitolyo sa Bool tungod sa daku nga kalihukan nga nagpadayon apan maligsan sa kahasul sa walay koryente.
Kini ngapasabut nga sa Domingo na masinati, sugod sa alas 4:00 sa kaadlawon hangtud matibawas ang mga trabahoon sa mga linemen sa NGCP nga maghimo sa annual maintenance activities subay sa Maasin-Ubay_Corella nga 138 kilovolts nga linya.
Kahinumduman nga niadtong milabay nga semana, nagpagawas og advisory ang NGCP pinaagi sa ME-20M-23-008 nga nagpahibaw sa gilaraw nga blackout samtang himoon nila ang total shutdown sa nahigutang linya lakip na usab ang Power barge 104 ug ang gisaligan nga Bohol Diesel Power Plant sa Dampas, syudad sa Tagbilaran.
Tungod sa nahisgutang kalihukan sa NGCP, makasinati og 14 ngadto na sa 9 ka oras nga walay serbisyo sa suga ug gahum dagitab ang katunga sa mga kalungsuran sa Bohol nga naalagaran sa Bohol Electric Cooperative I, subay usab sa ilang pahibaw.
Matud sa BOHECO 1, ang mga konsumidor sa koryente sa lungsod sa Carmen, Batuan, Bilar ug Sagbayan makasinati sa labing taas nga lanat sa 14 ka oras nga brownout.
Dinhing dapita, magsugod ang pagkapawong sa suga ug serbisyo sa koryente sa alas 4:01 sa kaadlawon hangtud na sa alas 6:00 sa kahaponon sa susamang adlaw, Enero 29.
Napulo ug usa usab ka oras nga pagkapalta sa serbisyo sa suga ug koryente ang masinati sa mga konsumidor sa Baclayon, Alburquerque , Loay, Loboc, Sevilla, Lila, Dimiao, Corella, Tagbilaran City, Dauis, ug Panglao, nga magsugod sa alas 4:01 sa kaadlawon hangtud sa alas 3:00 sa palis sa susamang adlaw.
Kini dala sa pagpuli sa mga lineman sa NGCP sa temporary nga optical ground wire subay sa Maasin-Ubay Corella nga sundan na usab sa ilang preventive maintenance activities.
Dala niini, wad-an una og supply ang Ubay. Corella ug Tagbilaran City Substations, samtang ipadayon ang 13 ka oras nga brownout sa linya nga nagsupply sa Upper Santo Nino sa Distrito sa Dao.
Sa scheduled Power Interruption notice, gibutyag usab nga ang mga konsumidor sa koryente sa nahisgutang mga lungsod, magsugod kawagtang ang ilang serbisyo sa suga ug gahum dagitab sa may alas 4:01 sa kaadlawon hangtud sa alas 3:00 sa palis.
Sa laing bahin, siyam ka oras nga brownout ang masinati sa mga konsumidor sa Tubigon, Calape, Clarin, Inabanga, Catigbian, Balilihan, San Isidro, Maribojoc, Loon, Antequera ug Cortes nianang adlawa.
Sa mga naulahi nga lungsod, magsugod ang ilang brownout sa alas 4:01 sa kaadlawon hangtud sa alas ala una sa palis.
Samtang nanghangyo ang NGCP sa dyutay nga pailob, gipasabut usab niini nga ang annual preventive maintenance activities usa ka lakang sa paglikay sa wala damha nga mga kakuli-an nga mahiabut sa wala maatiman nga mga linya ug kahimanan.
Gipasalig usab sa NGCP ilang ibalik dayon og pakatap ang serbisyo sa higayon nga nahuman na nila ang ilang mga maintenance nga kalihukan. (PIA-7/Bohol)