By Rey Anthony Chiu |10:47 PM November 12, 2022
Mas makadaginot sa gasolina ug mas dagko nga isda ang gilauman nga makuha diha’ng gitinuod sa Bureau of Fisheries and Aquatic Resources (BFAR) ang iyang saad nga maghatag og usa ka panagatan nga panglawod alang sa mga taga Valencia Bohol.
Atul sa kasaulogan sa ika 153 nga kasumaran sa Katukuran (Foundation Day) sa lungsod sa Valencia niadtong Oktubre October 27, 2022, gitugyan sa BFAR Region 7 ngadto sa lungsod nga gipangulohan ni Mayor Neil Dionisio Balite ang usa ka 38-footer nga fiberglass reinforced plastic boat uban sa upat ka mga gagmay nga banka de makina o nailhan sa tawag nga “pakura.”
Matud pa ni BFAR Bohol Fishery Officer Candido Samijon, ang pakura, usa ka matang sa panagatan nga gilangkoban sa usa ka mother boat ug upat ka mga gagmay nga bangka nga de makina.
Mag-uban ang upat ka gagmay nga bangka nga de-makina sa mother boat kon moadto sa lawod, mahimong ikarga ang nga gagmay nga bangka, o guyoron hangtud moabut na sila didto sa lugar nga panagatan.
Samtang nanagat ang motherboat, buhian niya ang mga gagmay nga bangka nga demakina aron managat sa ilang kaugalingon apan dili kayo halayo sa motherboat.
Ang tanan nga isda nga makuha, adto ibutang sa motherboat, kay kini adunay pasilidad sa pagpa-ice, ug aron dili madubok ang isda nga kuha.
Sa pakura, mahimo na nga magdugay ang panagatan sa lawod kay ang mother boat, adunay karga nga mga probisyones sa pagkaon ug pangihanglan sa mga mananagat.
Dugang ni Samijon nga ang pakura, nga nasuwayan na sa Japan, gipadangat na usab sa Pilipinas, ug duha niini ang gihatag sa BFAR ngadto sa Central Visayas.
Swerte ang Bohol kay sa duha ka pakura nga alang sa Central Visayas, kini tanan ania sa Bohol tungod kay ming balibad una ang Sugbo, nga mao unta’y hatagan sa usa ka unit sa pakura, dugang ni Samijon.
Ang lain nga unit sa pakura, gilaraw nga adto sa Jagna, segun pa sa mga taho, apan hinuon, wala pa kini kompirmasyon sa BFAR.
Sa iyang katungod, mapasalamaton si Mayor Balite sa katikaran sanglit ang Valencia naga atubang sa dakung lawod nga haum gayud usab sa panagatan nga panglawod.
Isdaonon man ang Valencia, sagad nga makuha didto, mga isda sa baybay tungod kay wala kayo mapauso didto ang pangisda sa lawod.
Ang pagtugyan gitambongan mismo ni BFAR 7 Regional Director Dr. Allan Poquita uban ni Bohol Provincial Fishery Officer Candido Samijon. (PIA-7/Bohol/Ana Liza Anib-Casquejo, BFAR Bohol PFO)
