By B. Melicor | 11:03 AM September 13, 2022
Usa ka 27- anyos nga lalaki ang nadakpan sa kapulisan human kini nanghadlok nga barangon kung dili maghubo ang iyang mga biktima.
Ang suspek nailhan nga si Vincent Rainer Payos, residente sa lungsod sa Inabanga. Siya nadakpan sa niadtong Sabado sa gabii (Sept. 10) sa Provincial Anti Cyber Crime Unit (PACU).
Sagaran sa mga biktima ni Payos mga batan-ong babaye nga nagpangidaron og 10-16 anyos.
Ang mga hulagway sa mga menor de edad nga hubo naa kini makit-an sa chat group nga ginganlan og “porn hub”.
Gawas sa hadlok nga barangon, hadlukon usab ni Payos ang mga menor de edad nga patyon ang mga ginikanan kung dili magpadala kaniya og hulagway nga hubo.
Gawas sa text, hulgaon usab nga ipakatap sa social media o himuon niining profile pic sa iyang account ang hubo nga hulagway kung dili makigkita kaniya.
Usa ka 13-anyos ang maoy labing uwahing biktima. Siya gihulga ni Payos nga barangon kon dili muhatag og hubo nga hulagway.
Matud ni Police Major Cresente Gurea, chief sa Inabanga Police Station, nahibulong ang ginikanan sa 13 anyos nga biktima nganong dili na mokaon ug mogawas sa ilang panimalay ang iyang anak.
Apan sa kaulahian,nisulti na ang biktima sa hinungdan,mao nga gi set-up ang entrapment operation nga maoy hinungdan sa pagkasikop sa suspetsado.
Dugang pa ni Gurea nga ka chatmate sa batan-ong biktima ang suspek nga nihulga pa kini nga patyon ang mga ginikanan sa babaye kung dili siya pakigkitaan.
Sa pagkakaron, anaa na sa bilanggoan si Payos nga mag-atubang sa kasong grave treats ug paglapas sa Republic Act 7610 kon Child Abuse Law.
