By Rey Anthony Chiu | 09:54 AM August 16, 2022
Sugod sa Agosto 15, 2022, temporaryo nga dili una paagi-an ang gitrabaho nga karsada sa Carbon, Lourdes Cortes, paingon sa eskina New Lourdes, Cortes, segun pa sa Department of Public Works and Highways Engineering (DPWH) District 1.
Kini dala sa pagpatuman sa pagpamaayo sa Access roads nga magpaingon sa Trades, Industries ug Economic Zones, nga gipundohan sa local nga pundo alang sa obras publikas.
Ang apektado nga dalan mao ang Cortes Cabagu-an-Lourdes-Anislag.
Matud pa sa pahibaw sa buhatan nga gilagdaan ni Engr Godofredo Laga, ang proyekto ilawom sa Regular Infra sa calendar Year 2022 General Appropriations Act o Republic Act 10155.
Ang nahisgutan nga trabaho nga nahasubay sa Provincial Road may gitas-on nga 1,043 metros ug may box culvert, gisugdan sa pagtrabaho Agosto 15.
Hinuon, aron pawala sa kahasol, may alternatibo nga detour nga magsubay sa daan nga barangay road kon ang tuyo paingon sa New Lourdes.
Wala usab hisguti sa DPWH kon hangtud kanus-a mahuman ang proyekto ug ang pagsira. (rahc/PIA-7/Bohol)
