By Rey Anthony Chiu | 06:54 PM August 10, 2022

Sa mga buot nga dili maapsan sa hulga sa nagsukarap apan mas mangtas nga Coronavirus disease (Covid-19), bukas pa ang mga pamakuna sa syudad sa Tagbilaran, nga anaa ipahimutang sa mga malls, butyag pa ni City Health Office (CHO) Information Officer Robin Culpa. 

Samtang nagpadayon usab ang lalawigan sa Bohol sa pagpahimutang sa ilang  vaccination center sa mismo nga ground floor sa bag-ong Kapitolyo, dinhi sa Tagbilaran, sa mga malls diin may daghang mga tawo, makaplagan ang libreng pamakuna. 

Sa matag Lunes ug Martes, ang vaccination team sa CHO makit-an sa Alta Citta Mall, ug motabok kini sa BQ Mall sa adlaw nga Miyerkules. 

Sa pagka Huwebes ug Biyernes, makit-an na usab ang CHO vaccination team sa Island City Mall, dayag sa nurse nga tigpamaba sa CHO. 

Kini samtang mikabat na sa 691 ka Bol-anon nga kinabuhi ang nabuhis sa wala pa gihapon mabuntog nga Covid-19.

Kini human mihinay na unta ang kaso sa mga natakdan sa hilabihan ka mananakod nga sakit nga unang mipatay sa kinabuhing Bol-anon niadtong Mayo 2020, bisan pa nga nanira ang Bohol aron pugngan nga makasulod ang sakit niadtong Marso 2020. 

Gikan niadto, nahimong labing kahadlokan ang Covid-19 niadtong Septembre sa mi-aging tuig diha nga ming-abut sa 6 ka tawo ang mamatay sa usa  ka adlaw dinhi tungod sa Covid-19. 

Human usab napalapad ang pamakuna batok sa sakit, nga gi-isip nga bugtong epektibo nga pamaagi sa pagkontrolar sa pagpanakod ug grabeng epekto sa sakit nga kasagaran mopatay gayud sa walay panalipod, mihinay hangtud nga may usa  ka buwan na nga usa na lang ang mabiktima. 

Apan inay gilauman nga matibawas na ug malukop na ang pamakuna aron hingpit nga tuldokan ang Covid-19, daghan pa gihapon ang wala maabut sa bakuna. 

Matud pa, daghan ang, tungod sa kagahi sa ulo ug sa kawalay salig sa sistema, nagdumili sa pagpabakuna.

Alang kanila, matud ni Culpa sa milabay nga semana, sa Tagbilaran  lamang, sa 30 nila ka kaso sa aktibo nga Covid-19, 27 niini pulos bakunado ug duha lamang ang may gipakita nga  kasarangang nga simtomas. 

Ang tulo ka grabe nga kaso niini, pulos mga walay bakuna. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.

%d bloggers like this: