By Rey Anthony Chiu | 10:54 PM July 14, 2022

Gisugdan sa usa ka pagpasabut kabahin sa scholarship program nga ilang nakuha gikan sa kagamhanan, mga responsibilidad aron magpabiling nalista sa bansaybansay ug mga tamdanan samtang nagpadayon ang Training for Work Scholarship Program sa 25 ka mga taga Bien Unido, Bohol niadtong Hulyo 7.

Gawas sa pagpasabut nga maoy unod sa Training Induction Program (TIP) alang sa Domestic Refrigeration and Air Conditioning (DomRAC) nga usa sa mga gipangita nga abilidad karon nga nagkadaghan na ang mga katawhan nga migamit sa air conditioning sa mga balay, buhatan ug sakyanan, gipailawom usab sila sa Drug Prevention Education (DPE), usa sa mga kasagarang rason nga molikoy sa maayong dalan ang tawo.

Didto sa Conference hall sa Bien Unido, ang TIP ug DPE, gipahiluna sa Technical Education and Skills Development Authority (TESDA) Inabanga Training Center ug sa Philippine National Police (PNP) sa Bien Unido.

Si Rochelle Delos Reyes, information Officer sa TESDA ug Manuelito Item, Community Technical Education Coordinator (CTEC) ug information Officer sa lungsod maoy nagalayonay sa pagpahiluna sa duha ka kalihukan niadtong adlawa.

Samtang si Richard Pintac, kinsa maoy tigbansay alang sa DomRAC maoy nagbatbat sa kamahinungdanon sa TESDA Biometrics-enabled Scholarship Registration System (BSRS) nga maoy magsibi nga inadlaw nga kamatuoran sa ilang way palta nga pagtambong sa bansaybansay, si May Grace Melicor usab ang nagtabang aron ang mga scholars maka fill-up sa ilang pagtambong sa TIP ug sa DPE.

Kahinumduman nga natumbok ni Item, kinsa maoy CTEC sa lungsod ang panginahanglan sa dugang abilidad sa pagkompuni sa RAC aron mapun-an usab ang kahigayunan sa mga katawhan sa lungsod nga makapangita og kapanarbaho-an.

Human sa pagpakig-sabot usab sa mayor, Rene Borenaga ug sa mga local nga opisyales, nahatagan sa pagtugot ang CTEC nga guyoron ang bahan sa Inabanga PTC aron moanha sa lungsod alang sa bansaybansay.

Ang DomRAC maoy labing bag-o nga bansaybansay nga nahitabo sa Bien Unido, u gang mga motapos niining scholarship, makaangkon sa sertipikasyon nga katumbas sa ikaduhang ang-ang sa katakus nga ikahatag sa nasudnong standards sa TESDA.

Kahinumduman usab nga gihimo na sa TESDA diha usab sa lungsod ang bansaybansay sa pagmaneho sa sakyanan, nga maoy kasagarang naka-ingon nga ubay-ubay na sa mga taga Bien Unido ang nagamhan nga mokuha og lisensya sa pagmaneho kay nabansay na og sakto. (rahc/PIA-7/Bohol uban ni Manuelito Item/MPIO)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.