By Rey Anthony Chiu | 09:59 AM June 24, 2022

Usa ka metal fabrication shop dinhi sa syudad sa Tagbilaran ang nakapakita sa sobra sa doble nga usbaw sa ginansya sa unom ka tuig niini nga pagpadagan sa negosyo.

Ug alang kang Teodoro Suares, tagdumala sa SL-DU Metal Works Supply and Services nga nahimutang sa JA Clarin niining syudad, nagsugod ang ilang kalampusan sa tabang nga ilang nakuha gikan sa Department of Science and Technology (DOST).

Daan na nga namuhunan gamit ang 17 ka mga welder ug trabahante nga tigsuporta sukad sa 2016, nakita ni Suares nga kon mapaspas lang ang ilang trabaho ug mapamenos ang usik, mas modaku pa ang ilang ginansya.

Sa tabang sa DOST pinaagi sa Small Enterprises Technology Upgrading (SET-UP), gitun-an sa mga tagdumala ang mga proseso ug teknolohiya aron padaghanon pa ang ilang mahuman nga mga proyekyo, ug gamit ang target nga bisan kon makahalin sila og dugang 30% ug kakunhuran ngadto sa 20% ang panahon sa pagkompleto sa trabahoon, mokita na sila og daku.

“Ang SET-UP maoy tabang sa kagamhanan aron ang usa ka mamumuhunan, maka-angkon og mga makina, himan ug mga kagamitan nga mopapaspas sa padagan sa trabaho, mopakunhod sa usik o mopagamay sa kakuyaw sa disgrasyo, aron moresulta og kaayohan alang sa gagmay nga mamumuhunan,” pasabot ni Vina Antopina, director sa DOST Bohol Provincial Science and Technology Center.

“Kini magpakita unya sa katawhan nga ang siyensya, alang gayud sa katawhan, ug dili angay kahadlokan,” dugang niya.

Dala niini, sa unang hugna sa ilang proyekto nga tabang sa DOST, migamit ang kompanya og P235,350 niadtong 2016, aron padaghanon pa ang ilang mga gihimo nga window grills, stainless railings, stainless countertops ug uban pang stainless nga kagamitan alang sa pag-andam sa pagkaon.

Sa pundo nga ilang nakuha sa DOST, ila kini nga gipalit og straight Plate Bending Machine ug Post Drill Cross Vise, dungan pa sa paghimo og technology needs assessment aron ilhon kon unsa pa ang mga makinarya nga ilang gikinahanglan aron makab-ot ang ilang target.

Matud ni Suares, sa paggamit pa lamang nila sa makina, nadugangan na ang kadaghanon sa ilang produksyon gikan sa average nga 40 ngadto na sa 55 ka job orders sa usa ka buwan.
Dala niadto, gikan sa 17 ka trabahante apil ang welders ug naa sa opisina, nakadugang sila og panawat og 17 pa aron lamang makatubag sa nagkadaghan nga orders.

Gawas pa, sa makina nga ilang gigamit, nakunhuran ang ilang usik ug pag-usab-usab sa gitrabaho ngadto sa halos katunga, o kon ma-usik sa dili tul-id nga pagputol kay demano man ang average sa 5 ka plates niadto, karon, dili na kaabut sa 2 ka steel plates ang ilang kwenta nga kinatibuk-ang masayang.

Sa ilang halin niadtong 2016 ngadto sa 2018, gikan sa P32M, misulbong kini ngadto sa P42M, o P10M sa tulo ka tuig.

Diha nga ilang namatikdan nga hinay pa gyud ang ilang pagtabas sa stell plate nga kadagaran mogasto og daghang oras, mihangyo na usab ang kompanya nagdto sa DOST sa dugang nga tabang alang sa ikaduhang hugna.

Sa kantidad nga P230,000, nakapalit na usab ang shop og brand new nga metal plate shearing machine nga mipakunhod sa panahon sa pagtabas gikan sa 4 ka oras kasagaran, ngadto na sa 48 minutos, segun pa ni Suares.

Tungod usab sa kaugmaran, gisulod sa kompanya ang paghimo og nga sandayong o plain sheet gutters, stainless steel gutters, steel trusses ug pagpanaud og atup, tungod kay mag paspas na silang makina.

Sa ikaduha nga pagsangkap, gikan sa 37 ka trabahante niadtong 2018, nanawat na usab sila sa 92 ka trabahante sa 2021.

Gatusan usab ka pilopilo na ang ilang mahuman nga mga proyekyo, ug mas mingdaku pa ang ilang kita ngadto sa P46 M.

Tungod niini, daku ang pasalamat sa nahisgutang metal fabrication shop sa DOST ug sa kagamhanan nga nagsangkap sa ilang shop ngadto sa kaugmaran sa ilang katawhan. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.