By Rey Anthony Chiu | 12:57 PM May 05, 2022

Pipila na lang ka adlaw sa dili pa ang piniliay sa nasudnon ug mga local nga posisyon, mibahad ang Department of Education (DepED) ngadto sa mga magtutudlo, opisyales ug ilang mga non-teaching personnel (NTP) batok sa pag-apil-apil sa pangampanya ug bukas nga pagdapig sa mga kalihukang political.

Kini samtang namatikdan nga ang mga tunghaan nga opisyal nga mipalubad sa ilang pangampanya, ug sa ilang mga magtutudlo sa dayag nga pagpangampanya sa mga partido, politico ug mga kandidato.

Sa usa ka pahayag nga gipatik sa mga social media ug mainstream sites, namahayag ang DepED: “Kami nanawagan sa atong mga DepEd officials ug trabahante sa pagpakayab sa political neutrality sa serbisyo sibil ug pagpatunhay sa pagkapropseyonal sa pagpatuman sa atong mga gimbuhaton.”

Gipahinumdom usab sa DepED nga isip mga opisyales ug trabahante sa goberno, nahisakop usab sila sa mga sumbanan ug balaod sa Civil Service Commission (CSC) ug sa Commission on Elections (Comelec).

Kining nahisgutan nga mga ahensya may mga gipatuman nga mga balaod ug sumbanan nga nagdili sa mga kawani sa goberno sa paghimo og mga pundok aron mangampanya /o mang-agni sa pagdapig sa bisan kinsang kandidadto, partido ug pagpasiugda sa mga pagtapoktapok political, pagpasibya ug pagmantala, pagpabansiwag, ug pagpang-apud-apod sa mga himan sa pangamp[anya aron pagsuporta ug paghimo og mga kalihukan batok sa bisan unsa nga partido o kandidato, gawas pa sa ubang mga nahisgutang lagda.

Partikular usab nga gitumbok ang paghikaw sa mgaopisyales sa DepEd sa paggamit sa ilang posisyon ug otoridad sa pagpakabig sa mga magtutudlo ug mga non-teaching staff ubos sa ilang superbisyon sa pagsuporta sa iyang gipili ug gipaboran nga kandidato o partido.

Dugang niini, mahimong kapasakaan og sumbong ang mga opisyal, empleyado ug trabahante sa goberno nga ubos sa CSC sa mga tukmang kaso nga gitagana alang niadtong mag-apil-apil sa piniliay o electioneering.

Alang sa mas kasaligan nga ebidensya niini, miaghat ang mga tinugyanan sa nahisgutang mga ahensya sa pagtigum og pruweba pinaagi sa screenshot, pagkuha sa hulagway sa tataw nga pagsupak sa lagda ug ang pagkuha og video aron kahatagan sa tukmang lakang ang mga hingtungdan.

Matud sa DepED, padayon pa ang ilang Election Task Force (ETF) sa pagsuroy sa mga rehiyon ug dibosyon aron sa paghimo og mga briefings alang sa pagpangandam sa piniliay samtang pagbahad usab ni bisan kinsa sa ilang ahensya nga nahi-apil sa electioneering ug partisan politics. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.