By Rey Anthony Chiu | 09:30 PM December 03, 2021

Unahon ang wala pa mabakunahi o wala pa makakompleto sa pagkuha sa panalipod batok sa coronavirus disease (Covid-19), sa dili pa manghatag og booster dose.

Kini ang usa sa mga punto nga nasukip sa Department of Health Memorandum No 2021-0492 (DM 2021-0492) nga gipagawas naidtong Nobyembre 19, 2021.

Sa memorandum, labing menos unom ka buwan pa human sa pagkakuha sa kompleto nga dose sa duha ka tupokan sa bakuna batok sa Covid ug tulo ka buwan human matupokan sa Johnson and Johnsons, ang paabuton sa usa ka tawo nga anaa sa dakong risgo sa sakit aron kahatagan sa booster dose.

Ang DM No. 2021-0492 nailhan usab nga “Interim Guidelines sa Administration ug Management sa Covid-19 Vaccine Booster ug Additional Doses alang sa Priority Group A2: Senior Citizens lapas sa 60 anyos ug Priority Group A3: mga hamtong nga may daan nang gibati nga sakit.

Kahinumduman nga niadtong Nobyembre 29, 2021, ang Philippine Food and Drug Administration (FDA) mipagawas sa amendment sa Emergency Use Authorization (EUA) alang sa pagpatupok sa bakuna nga susama og platform o managlahi og platform isip booster doses ngadto sa mga pwedeng tupokan nga mga nabakunahan na, subay usab sa National Covid-19 Vaccine Deployment Program.

Niini, giila na nga pwede tupokan sa booster dose ang mga hamtong nga 18 anyos pataas.

Matud pa sa DM, ang desisyon sa pagpagamit sa dugang o booster dose ngadto sa tanan nga indibidwal, 18 anyos pataas, kinahanglan hinuon nga ipasubay sa tukmang pagtimbangtimbang sa risgo og kaayuhan nga ikahatag kon dungagan sa booster dose alang sa Covid-19 ang bakunado na.

Sa nasampit nga DM, nakabutang didto nga ang mga nakakuha nag kompleto nga bakuna nga hamtong na ang edad mahimo na nga modawat sa usa ka tupokan sa booster dose sa bakuna nga parehas og kinaiya sa iyang unang bakuna o bisag dili parehas basta may labing menos 6 na la buwan human siya matupoki sa Pfizer-BioNTech, Moderna, Sinovac, Gamaleya, ug AstraZeneca Covid-19 vaccines.

Sa laing bahin, sa kadto nga natupokan sa bakuna nga Johnson and Johnsons, mahimo basta miabut na og tulo ka buwan human siya mabakunahi.

Bisan pa niining tanan, ang tanang namakuna gipahinumduman sa pagseguro nga makahuman na sa tanan nga nanginahanglan sa unang dose sa dili pa sila magsugod sa booster doses sa mga populasyon nga naa sa dakung hulga nga matakdan.

“Primary vaccines alang sa mga wala pa mabakunahi, ug kadtong wala pa mahuman sa ikaduhang tupokan ayha pa ang booster shots,” pahinumdom sa DOH.

Ang Booster doses alang pa lamang sa bakunadong anaa sa Priority Group Al o kadtong nanarbaho sa frontline sa mga medical ug health facilities.

Pwede usab ang booster o dugang nga doses sa Priority Group A2 o Senior Citizens nga nag edad og 60 anyos pataas ug kadtong mga immune-compromised persons ubos sa Group A3.

Ayha pa magamit ang booster doses alang sa bakunadong hamtong 18 anyos pataas, subay usab sa ilang mga kahimtang og risgo. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.