By Rey Anthony Chiu | 07:27 PM October 20, 2021

Samtang sugdan pa sa kagamhanan ang pagpabarug sa Temporary Treatment and Monitoring Facility (TTMF) sa gibiyaan nga tugpahanan sa abyon sa Tagbilaran, mikabat na sa 14 ka mga TTMF sa tibuok Bohol ang karon nanawat na og nag-atiman sa mild ug moderate nga kaso sa coronavirus disease (Covid-19), basta kay stable na kini.

Kini maoy gipadayag ni Gob Arthur Yap didto sa Bohol Inter Agency Task Force Strategic Communications online Meeting niadtong Lunes, Oktubre 18.

Kahinumduman nga usa ka Executive Order nga gipagawas ni Gob Yap nagamandu sa mga Local Government Units sa pagpalapad ug pagpabarug sa mga TTMF isip mga step down facilities nga kapadulngan sa mga pasyente sa Covid-19 nga ipagawas nga sa mga tambalanan human mahukman nga stable na ang ilang kahimtang.

Kahinumduman nga sa mi-agi nga buwan, halos mapuno na ang mga tambalanan sa Bohol sa mga pasyente sa Covid, nga nagbutang sa lalawigan sa halos labing taas nga Alert Level 4.

Tungod kay halos malusno na ang health care system, nagpagawas ang BIATF og hukom, pinaagi ni Gob Yap, sa pagtugot sa mga tambalanan sa pagpagawas sa mga pasyente nga dili na kaayo grabe aron adto na mopa-ayo sa mga TTMF isip step-down facilities.

Kini usab aron ang mga mabakante nga nga katre sa mga tambalanan, mahimo na nga maokuparan sa mga mas nanginahanglan.

Gimugna usab sa gobernador ang usa ka bahan nga maoy mag-himo sa pagsusi sa mga TTMF sa mga kalungsuran kon makapasar na ba kini sa pagdawat sa mga serbisyo.

Dungan usab niini, ang kagamhanan mipadayan nga magtukod kini og usa ka TTMF, pinaagi sa Department of Public Works and Highways, didto sa biniyaang tugpahanan sa abyon dinhis Tagbilaran.

Matud sa tinubdan sa Kapitolyo, sugdan na ang pagtukod sa pasilidad karong semanaha.

Sa sama nga katikaron, mangayo, matud pa sa gobernador, ang Bohol og mga negative pressure tents sa kaulohan, aron magamit sa tukoron nga TTMF.

Kini samtang hinay na nga mikunhod ang mga kaso sa Covid sa kaulohan, mao nga possible nga mahimo na kining mang hatag sa ilang mga pasilidad ngadto sa mga lugar nga nagpadayon pa ang bugno sa Covid. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.