By Rey Anthony Chiu | 07:18 PM October 06, 2021

Mahimo na nga magparehistro sa Philippine ID system and mga nag-edad og 5 anyos pataas, kini maoy gibutyag sa Philippine Statistics Authority (PSA) ngadto sa mga Bol-anon didto sa labing bag-o nga Kapihan sa PIA.

Matud ni Provincial Statistician Jessamyne Anne Alcazaren, kadtong wala pa marehistro alang PhilSys, mahimo na nga moadto sa mga kalungsuran nga nagpadayon ang nasudnong registration samtang ania pa ang mga gamit pagpangrehistro dinhi.

Sa pagparehistro, mahimong adto sa labing duol nga registration center, o sa mga online registration centers, dugang niya.

Mas maayo, matud pa nga kon sa dili pa moadto, miagi na og demographic information registration, dayon na ang pagadto sa registration centers.

Mismo si Alcazaren, mipalanog sa panawagan samtang namatikdan nga mihinay na ang pagparehistro alang sa nasudnong ID system, busa mahimo na nga ang mga nag-edad og 5 anyos pataas, makasulod na.

Matud sa hepe sa PSA, kasamtangan nga bukas ang mga 20 ka PhilSys registration centers sa kalungsuran nga gitugotan na nga modawat bisan sa mga wala manimuyo sa mga nahisgutang lungsod.

Ang mga bukas nga registration centers mao ang Bien Unido, Bilar, Carmen, duha sa Tagbilaran City sa City Tourism ug sa Galeria Luisa, sa Dauis, Guindulman, Jagna, Loay, Loon, Mabini, Panglao, Pilar, Pitogo o CPG, Sagbayan, San Miguel, Talibon, Tubigon, Ubay ug Valencia.

Pahimangno usab sa PSA, sa mga taga Anda, adto parehistro sa Mabini samtang ang mga taga Batuan, adto sa Bilar.

Tumong sa PSA Bohol nga sa pagtapos sa tuig 2021, makaparehistro sila sa 1,033,082 ka mga Bol-anon gamit ang 62 nila ka mga computer registration kits, saysay ni Alcazaren, didto sa Kapihan sa PIA.

Hinuon, sa pagka karon, nakaparehistro na ang PSA sa 836,406 ka mga Bol-anon, kadaghanan kanila nagpaabut na lang nga maobut ang mismo nga ID nga iagi sa koryo gikan sa Manila.

Bisan pa man, nahingawa ang PSA nga kon maglangay-langay ang uban, dili maseguro nga magbilin pa og daghang computer registration kits sa Bohol sa pagtapos sa 2021.

Sa mga taga layo nga wala pa marehistro ug mokanaug sa Tagbilaran, matud sa PSA nga bukas pa gihapon ang Registration Center sa City Tourism Office, atbang sa Island City mall, ug sa second floor sa Galeria Luisa diin nahimutang ang Fixed Registration Center.

Dinhi, modawat sila sa walk in, bisan pa man nga mas maayo gihapon nga makakuha sa appointment aron kalikayan ang pagdaghan sa mga tawo, pasabut ni Alcazaren. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.