By Rey Anthony Chiu | 12:41 PM September 21, 2021
Ning panahon sa pandemya, giunsa ba ninyo paghipos ang mga ginamitan nga face masks, face shields ug uban pang mga gamit nga dili malata sama sa sudlanan sa alcohol, surgical gloves ug mga batakang panalipod sa lawas sa coronavirus disease?
Kini nga pangutana mitumaw human ang Bureau of Fisheries and Aquatic Resources-Central Visayas (BFAR-7) nakamatikod sa 772 ka kilos nga basura lakip na ang face masks, clinical gloves, plastic nga mga sudlanan, selopen nga kausa ra magamit, plastic ug styrofoam nga pustanan sa mga food deliveries, botelya nga mabuak, mga sienna nga gigamang trapo, lata ug nga diapers ang napunit sa lima ka adlaw nga International Coastal Clean-up.
Gani, segun pa sa BFAR, sa coastal cleanup sa Cogtong Candijay nga giapilan sa mga kabataan ug mga mangingisda ug sa ilang banay, kasagaran sa ilang mga napunit sa ilang kinaugalingon nga cleanup niadtong Septembre 17 mao ang disposable nga face masks.
Ang BFAR nagpahimo og walo ka tumbok nga mga coastal clean-up activities sa mga kumunidad nga nagsawo sa kahinguhaan sa usa ka baybayon, usa niini ang Cogtong Bay sa Candijay.
Sa laing mga bahin, sa mga quarantine facilities, dala sa kadelikado sa sakit nga mahimong makatakod pinaagi sa laway, nahimong batasan ang pagpanghatag og pagkaon sulod sa mga disposable plastic o Styrofoam ubanan sa plastic nga kutsara og tinidor.
Kasagaran niini, mahibilin ra sa mga quarantine facilities nga kon mahipos man, adto usab unta paingon sa mga recycling centers apan kay wala man niini ang Bohol, motapok lang usab sa mga tipiganan sa basura hangtud nga mahipos og tarong.
Kasagaran niini, makatag lang usab og may dakong kahigayunan nga maanod sa mga kanal paingon sa dagat.
Subay niini, miawhag ang BFAR ngadto sa publiko sa pagsunod sa sakto nga paagi sa pagtipig sa disposable face masks, plastics ug uban pang basura nga gikan sa mga quarantine facilities, kwarto nga gigamit sa kwarantina sa balay, ug pagpugong sa pagsinagbot pinaagi sa paglabay bisag asa, sa mga basura.
Nahadlok ang BFAR nga sa kadugayan, kining mga basura nga wala masakto pagtipig, makaabut sa mga kabaybayonan ug maoy makahugaw sa kasubaan, kadagatan ug mga kalasangan.
Kon mokapot sa kagasangan, ang mga basura mahimong mopatay niini ug makabsan na hinuon og pagkaon, puy-anan ug kapasilongan hinungdan nga dili na mosanay. (rahc/PIA-7/Bohol)
