By Rey Anthony Chiu/PIA-Bohol | 11:37 AM August 26, 2021

Usa ka ginang ang nagpabakuna batok Covid-19 sa Booy vacvination center sa Dakbayan sa Tagbilaran.

Anaa pa sa 16.41% ang nakab-ot sa Bohol nga panalipod sa iyang katawhan, pinaagi sa pagpabakuna batok sa coronavirus disease (Covid-19).

Ang kasayuran, subay sa labing bag-o nga taho nga nagasukad sa Bohol Inter Agency Task Force (BIATF) for the management of Emerging Infectious Disease niadtong ala 1:00 sa palis sa Agosto 24, 2021.

Sa labing bag-o nga datus gikan usab sa Philippine Statistics Authority (PSA), nabutyag nga niadtong Census on Population and Housing sa 2020, Mayo 31, 2021, ang kinatibuk-ang ihap sa molupyo sa Bohol anaa sa 1,394,329.

Subay sa mga batid sa epidemya, mabuntog lamang ang suliran sa pagtakud-takod sa sakit nga Covid kon 70% sa kinatibuk-ang populasyon sa usa ka lugar, kompleto nga nga katupokan sa duha ka beses sa bakuna batok niini nga sakit.

Dugang pa, kon makab-ot na sa usa ka lugar ang 50% sa iyang populasyon ang mabakunahan, magsugod na og ubos ang tanang mga kadaghanon sa natakdan, mamatay ug mas kaluagan na ang mga community quarantine protocols.

Ug kon bisan makab-ot na sa usa ka lugar ang paghatag og kompleto nga bakuna panalipod sa Covid sa 30% sa iyang populasyon, wala nay madugang pang bag-ong kaso, ug magpabilin ang kadaghanon sa mga apektado sa sakit.

Niini, dugang sa mga batid, makab-ot na ang gitinguha nga herd immunity, ug diin, sanglit bakunado na ang kadaghanan, wala nay kapadulngan ang kagaw ug kini hinay na nga mapuo kay wala nay matakdan.

Sa labing bag-o nga taho sa BIATF, mikabat na sa 160,255 ka Bol-anon ang nakakuha na og kompleto nga panalipod sa kagaw pinaagi sa pagpabakuna.

Ang 160,255 hinuon, anaa pa sa 16.41% sa 1,394,329 nga kinatibuk-ang populasyon.

Sa susama nga taho sa BIATF, sa pagka karon, aduna na usab 151,235 ka mga Bol-anon nga nahatagan na sa partial nga panalipod pinaagi sa pagpamakuna.

Kini nga mga may partial na nga panalipod, gipaabut nga human sa usa ka buwan, makakuha na usab sa ilang ikaduha nga tupokan sa bakuna.

Nianang panahuna, kon makapatumod lang dinhi sa Bohol sa mga gikinahanglang bakuna ang kagamhanan, makab-ot na sa Bohol ang 31.91 % sa kinatibuk-ang populasyon.

Niana usab nga panahona, nakab-ot na sa Bohol ang 44.68% na segun sa mga batid, mahimong makit-an na ang hinay nga pag-ubos sa kaso. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.