By Rey Anthony Chiu/ PIA-Bohol | 07:59 AM August 19, 2021

Mikabat na sa 239 ka Bol-anon ang nahunosan sa kinabuhi tungod sa coronavirus disease (Covid-19), Agosto 19, apan may dyutay nga dan-ag nga balita dala niini.

Sa pagtandi sa mga namatay sa milabay nga duha ka quincenas, napakita nga mikunhod sa 53.3 porsyento ang mga nangamatay gikan sa Julyo 18 ngadto sa Agosto 18, 2021, segun sa datus nga gipaambit sa Bohol Inter Agency task Force on the Management of Emerging Infectious Diseases (BIATF).

Sa labing uwahi nga kasayuran gikan sa BIATF, napakita nga sa unang quincena: July 18 ngadto sa Agosto 2, 2021, mikabat sa 45 ka kinabuhi ang nakalas tungod sa nahisgutang sakit nga mananakod.

Sa pagkasunod nga quincena, gikan sa Agosto 3 ngadto sa Agosto 18, mikabat na lang sa 24 ang namatay, subay gihapon sa nahisgutang taho.

Gani, niadtong Julyo 25, mingsapong sa labing daghang patay nga natala dihang miabut sa 8 ang nalista sa mga nangamatay.

Hinuon, gipasabut sa BIATF nga mahimong dili lamang usa ka adlaw nahitabop ang walo, kon dili mahimong kini nahitabo pipila ka adlaw apan wala lamang dayon malista sa talaan tungod sa ulahi ug pagkalangay sa mga taho gikan sa kalungsuran.

Sa ikaduhang quincena, niadtong Agosto 15 ang labing daghan nga namatay nga Bol-anon tungod sa Covid, nga ming-abut sa 3 sa usa ka adlaw.

Niini, daghan ang nagtuo nga ang hinay nga pagkunhod sa mga nabiktima sa Covid, epekto na sa mas nag-amping nga katawhan ug sa nagkadaghan nan ga nabakunahan.

Segun sa mga nahaunang taho, mikabat na sa sobra sa 42 porsyento sa mga nalista nga prayoridad sa pagpangbakuna ang naabut sa vaccination teams ug nakakuha na sa tag duha ka tupokan o nakakompleto na sa gikinahanglang panalipod batok sa pagkagrabe o pagkamatay tungod sa Covid.

Namahayag na ang mga eksperto nga sa mga nabakunahan nga na-igo pa gihapon sa Covid, wala kanila ang natumod sa mga ospital o namatay, tungod ka sa bakuna, yano lamang ug wala nag ani mopakita og timailhan sa pagtakod ang uban.

Nunot usab niini, naapsan na sa Bohol ang positivity rate sa kinatibuk-ang average sa Pilipinas.

Niadtong Agosto 18, gipakita sa BIATF nga miabut na sa 11,029 ang kinatibuk-ang ihap sa mga kompirmado nga natakdan sa Covid, segun sa datus nga nakuha sa mga pasyente nga miagi sa Covid testing.

Kini, 12.93 porsyento sa 85,257 ka mga pasyente nga gikuhaan og swab samples aron matestingan sa presensya sa kagaw nga maoy nagdala sa Covid.

Sa yano nga pagsabut, kini nagtug-an nga sa matag 100 ka Bol-anon nga gikuhaag swab samples alang sa Reverse Transcription Polymerase Chain Reaction (RT-PCR) test, 12 na niini ang magpositibo sa Covid.

Sa Pilipinas, anaa pa sa 12.76 porsyento ang positivity rating samtang sa National Capital Region diin namatikdan ang labing taas nga positivity rating, naana sila sa 25.25%. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.