By Rey Anthony Chiu/PIA-Bohol | 09:37 AM August 11, 2021

Sputnik V vaccine. Photo: Sputnik V

Si coronavirus disease (Covid-19) testing czar ug COVID-19 task force Deputy chief implementer Secretary Vince Dizon mibutyag nga moabut sa gabii sa Agosto 11 ang mga bakuna nga mahimong ikaduhang tupokan sa Gamaleya Sputnik V sa mga lumilihok sa turismo sa Bohol, nga una nang nakakuha sa unang dose sa milabay nga Hunyo.

Ang balita gihangop sa mga lumilihok sa industriya sa turismo sanglit kini dugay ra nilang gipaabut.

Si Sec Hizon, kauban ni Department of Tourism Secretary Bernadette Romulo Puyat nahidangat sa Bohol alang sa paghimo sa ceremonial vaccination sa mga lumilihok sa turismo didto sa Bellevue Hotel sa Panglao.

Kini human naghimo na usab ug una nga ceremonial vaccination ang mga local nga opisyales niadtong milabay nga buwan.

Kahinumduman nga gitagan-an sa kagamhanan ang mga lumiluhok sa turismo sa Bohol sa pahat sa mga bakuna, aron mas mapadali niini ang pagpabalik sa turismo, ang industriya nga nagbuhi sa mas lapad na nga hut-ong sa mga Bol-anon.

Gani, una nga gipadala sa kagamhanan, pinaagi sa pagpangusog ni Sec Puyat, ang 5000 ka tupokan sa Sputnik V nga ginama sa Gamaleya sa Russia, aron unang ikatupok sa mga Bol-anon, niadtong mi-aging buwan.

Ang mga lumilihok sa industriya sa Bohol maoy labing unang mga trabahante nga gibakunahan sa tibuok nasud, ug gani nauna pa sa mga gitumbok nga A4 o essential workers.

Gikataho nga kaniadto, gihangyo ni Gob Arthur Yap ang kagamhanan sa pagpahat og bakuna alang sa mga lumulihok sa turismo, ilabi na niadtong anaa sa frontline operations, aron makabukas na ang lalawigan og balik alang sa mga bisita, ug dili na kini mangahadlok pang matakdan.

Sa mga bakuna nga nangabut, matud ni Provincial Administrator Katherin Pioquinto, ang kamaayo og relasyon sa gobernador ngadto sa mga lideres sa nasud ang nakaingon nga ang Bohol una nga lalawigan kang kinsang lumilihok sa turismo, una nga gibakunahan.

Niadtong panahona, gipasugdan ang pagpangbakuna sa mga tourism industry workers didto sa upat ka mga vaccination sites nga gibuksan sa Panglao, alang sa ilang pamakuna.

Human sa una nga tupokan sa mga trabahante sa turismo niadtong ikaduhang semana sa Hunyo, daghan na ang nangutana kon hain na ang ikaduha nga tupokan, ilabi na nga midagan na og sobra sa usa ka buwan ang ila unta nga ikaduhang tupokan.

Hinuon gipasalig sa mga tinugyanan nga bisan kon malangan ang ikaduhang tupokan sa bakuna, dili kini mawad-an sa gahum, gani, mas momaayo pa ang epekto niini, matud pa.

Sa gipadayag ni Sec Dizon, iyang gipasabut nga sa pag-abut sa nahisgutang bakuna nga Sputnik sa nasud, segurado na usab nga may pahat niini alang sa pagpakompleto sa proteksyon sa mga natupokan na nga industry workers.

Gawas sa Sputnik nga moabut sa dili madugay, gisaad usab ni DOT Secretary Puyat nga may 10,000 ka doses sa bakuna nga Pfizer ug laing 5,000 ka doses sa Sinovac ang madawat pa sa Bohol, kining tanan alang gihapon sa mga lumilihok sa turismo.

Ang maong balita, gihangop usab sa mga Bol-anon sa industriya, kinsa nangandoy nga makabaton na sa proteksyon aron dili na mahadlok ang turista moanhi dinhi.

Sa ubang bahin sa nasud, bisan kon turismo usab ang ilang gipanghingusgan, wala pa makadawat ang ilang mga trabahante sa bakuna, segun sa mga nakasaksi sa sitwasyon didto. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.