By Rey Anthony Chiu/PIA-Bohol | 06:33 PM August 03, 2021
Giabisohan na ang tanan nga nakasakay sa byahe sa OceanJet gikan sa Sugbo paingon nganhi sa Bohol Agosto 2, sa pagpailawom dayun sa estriktong 14 ka adlaw nga kwarantina.
Kini subay usab sa mandu sa nasudnong Inter-Agency task Force on the management of Emerging Infectious Diseases nga ipailawom ang kinatibuk-ang Sugbo sa Modified General Community Quarantine (MGCQ) sugod Agosto 1.
Sa resolusyon nga gisagop sa nasudnong IATF, gipailawom ang pipila ka mga lugar sa nasud nga adunay kadadlokang pagsaka sa mga kaso sa estriktong klasipekasyon sa community quarantine.
Sa MGCQ, gidili ang paglakaw lakaw, labi na ang paggawas sa mga tawo sa sulod ngadto sa laing mga lugar gawas sa MGCQ.
Kini aron pugngan ang pagdagsang sa sakit nga mahimong dala sa mas kahadlokan nga delta variant nga gikatahong gidudahang maoy nakapadaghan sa pagtakod sa Sugbo, pipila ka lugar sa Metro Manila ug sa pipila ka lugar sa Mindanao.
Ang Sugbo karon, bisan pa nga nahangyo pa nga ipailawom sa mas luag nga General Enhanced Community Quarantine apan mas daghang restrictions, una na nga gipahimutang sa NIATF sa MECQ.
Matud pa sa BIATF, ang tanan nga pasahero ug tripolante sa Oceanjet nga mingdunggo gahapon gipahimangnoan na nga mopailawom sa pugos nga 14 ka adlaw nga kwarantina.
Dugang sa BIATF nga ang mga pasahero, gisugat sa ilang tagsatagsa ka local nga kagamhanan ug gikwarantina na dayun.
Gikwarantina na usag ang mga tripolante sa barko nga midunggo dinhi.
Sa laing bahin, ang tibuok barko, nga nia na gigaid sa sa pantalan sa Tagbilaran, usa na nga gipaagi sa dis-infection ug himoan na sa ika duha nga pagpamatay-kagaw sa dili madugay, kini aron pagseguro nga dili makatabok gikan sa Sugbo ang COVID-19 delta variant.
Kanselado na usab ang mga byahe sa OceanJet sa Cebu-Tagbilaran na ruta, hangtud sa sunod nga pahibaw.
Ang gikahadlokan nga local community transmission sa delta variant sa Sugbo, maoy gidudahan sa kalit nga pagdaghan sa kaso didto.
Subay sa mga taho ug hulagway nga gipaambitan sa social media, may mga pasyente na sa Covid sa Sugbo ang nagpabilin na lamang sa ilang mga sakyanan samtang giaturan og oxygen apparatus samtang nagpaabut nga may mabakante nga kahigdaan tungod sa pag-awas na sa mga pasyente sa mga tambalanan niini.
Dinhi sa Bohol, sa pagpangandam kon pananglit moabut ang variant dinhi, naghimo na ang local nga Department of Trade and Industry og monitoring sa stocks sa medical grade oxygen para maseguro nga walay pagtipig sa produkto ug pagpakang-a sa presyo kon may emerhensya, segun pa sa information officer sa DTI nga si Vierna Ligan. (rahchiu/PIA-7/Bohol).
