By Rey Anthony Chiu | 10:41 AM October 13, 2021

Kon gikan sa gawas, bisan pa kon nibansay sa social distancing, mas maayo pa gihapon nga maneguro nga mag-dis-infect una mosulod sa balay aron dili aksidente nga makadala sa kagaw nga mananakod.

Kini maoy mitumaw nga tambag human napakita sa Department of Health (DOH) nga diha sa pamilya ang labing daghan nga nakit-ang kaso sa pagtakod sa coronavirus disease (Covid-19) dinhi sa Bohol.

Sa usa ka pagtuon kabahin sa mga tinubdan sa impeksyon sa Covid-19 diha sa mga aktibong kaso dinhi sa Bohol, gipadayag didto sa online nga tigum sa Bohol Inter Agency Task Force on the management of Emerging Infectious Disease (BIATF-EID), nga sa 949 ka mga aktibong kaso nga gitun-an, 467 niini nakakuha sa sakit sa kauban sa banay.

Ug samtang nagpadayon ang kaepektibo sa mga orden ehekutibo nga nagdili sa mga menor de edad ug mga sobra sa 65 anyos nga makagawas sa mga panimalay, kini nagtumbok ngadto sa mga sakop sa banay nga maggawasas-gawas alanag lamang unta sa importante nga lakaw.

Hinuon, gilatid usab sa nahisgutang nga orden ehekutibo nga kon mogawas lamag alang sa pagpangita o pagkuha sa pagkaon ug gikinahanglang mga serbisyo, dili kini masakop sa pagdili sa paggawas.

Wala man hisguti sa DOH, sa taho ni nurse Neil John Oclarit kon ang mga tinubdan sa kasayuran nga ilang nakuha, resulta ba sa ilang pagtuki o gikan sa mga datus nga nakuha sa mga contact tracing teams, tataw nga si 49.21 % nga mga nagpositibo sa COVID nga nadala sa kauban sa banay.

Didto sa susamang taho, lain nga 337 ka mga kaso sa kapin sa 900 ka aktibong kaso ang wala gyud matumbok kon diin kini makuha.

Ang 337 ka kaso naglangkob sa 35.51% nga mga kaso nga walay kalibutan ang pasyente kon diin kini matakdi: butang nga mahimong mahitabo lamang kon kini nga pasyente nagsige og gawas nga kuwang ang iyang panalipod.

Sa nasampit nga taho, makita usab nga anaa sa 65 ka aktibo nga kaso sa Covid nakuha kini sa lugar gitrabaho-an.

Sa mga gikahadlokan nga mga lugar sama sa mga hospital, napakita sa taho nga 8 lamang o wala pa sa 1% ang nasakit sa Covid nga didto hingtakdi sa tambalanan, bisan pa nga may mga tawo gyud nga nag-asikaso sa mga labihan ka mananakod nga sakit didto.

Apan bisan pa sa tanan, sanglit sa banay ang labing dako nga tinubdan sa sakit, angay lamang gayud nga ipahimutang ang mga panalipod didto.

Segun sa mga hanas sa kasanihan, maayo nga bansay ang paghukas ug paghubo sa gisuot sa gawas sa dili pa mosulod sa balay, aron didto na kini ilahos sa labhanan.

Maayo usab, kon manghunaw ug mang dis-infect, ug labing maayo ang maligo sa dili pa makighagwa og moduol sa mga sakop sa banay ang si bisan kinsa nga gikan sa gawas aron kapugngan ang pagkaduhig sa uban nga matakdan na hinuon ang mga nagpuyo sa balay. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.