By Rey Anthony Chiu, PIA-Bohol | 08:19 PM May 10, 2021

Gideklara na ni President Rodrigo Duterte ang Huwebes, Mayo 13, 2021 isip regular holiday karong tuiga, isip kalakip sa mga regular holidays nga dili mosibug ang petsa.

Ang pahdeklara, segun pa ni Presidente Rodrigo Duterte sa iyang gilagdaan nga proklamasyon, aron kahatagan ang nasud sa higayon nga saulogon ang Eid’l Fit’r o pista sa Ramadan.

Pinaagi sa Proclamation No. 1142 nga gilagdaan sa Presidente niadtong Mayo 10, 2021, gibutyag sa pangulo sa nasud nga una na nga girekomenda sa National Commission on Muslim Filipinos ang pagdeklara sa Huwebes, Mayo 13 isip nasudnong holiday alang sa pagsaulog sa Ramadan.

Kahinumduman nga pinaagi sa Republic Act 9177, nadeklara na ang Eid’l Fit’r o ang pista sa Ramadan isip regular nga holiday sa tibuok nasud.

Ang Eid’l Fit’r gisaulog sa kalibutan sa mga Muslim sa sunod nga tulo ka adlaw mahuman ang usa ka buwan nga pagpu-asa.

Segun pa sa Presidente, ang kinatibuk-an nga kapupud-ang Pilipinhon kinahanglan kahatagan sa labing luag nga kahigayunan sa pagduyog sa mga igsoon nga Muslim sa kasaulogan sa kalinaw ug pagpakigsandurot subay usab sa mga sumbanan sa community quarantine, social distancing ug uban pa nga health and security measures.

Alang niining katuyuan, aron hiusahon ug kahatagan og bili ang religious ug kulturanhon nga kamahinungdanon sa Eid’l Fit’r sa nasudnon nga pamuot, nakita ni Presidente Duterte nga gikinahanglan gayud nga edeklara ang Mayo 13 Huwebes, isip regular holiday. (rahchiu/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.