By PR | 12:40 AM April 11, 2021

Gipamatud-an sa Court of Appeals ang desisyon sa Securities and Exchange Commission (SEC) sa pagbakwi sa lisensya o certificate of incorporation sa Kapa-Community Ministry International tungod sa ilang mga pagpangilad batok sa mga katawhan.

Subay sa 18 ka pahina nga desisyon niadtong Marso 11, 2021 ang CA Special 16th Division miingon nga ang SEC ang adunay eklusibong hurisdiksyon mahitungod sa petisyon alang sa pagbakwi sa incorporation sa KAPA. Sa susamang higayon gipamatud-an sa Court of Appeals nga ang petisyon sa pagtantang og legal nga personalidad sa KAPA subay sa saktong proseso ug ang desisyon sa SEC base sa solidong kapasikaran ug igong ebidensiya.

Ang Commission En Banc nihimo sa maong order of revocation niadtong Abril 3, 2019 human makita nga ang KAPA nitanyag og namaligya og securities ginamit ang usa ka investment contract ug pagtakoban nga kini donasyon, ngadto sa publiko nga walay pagtugot sa SEC. Subay sa Section 6 (i)(2) sa Presidential Decree No. 902-A, ang SEC pweding mobakwi sa certificate of incorporation sa usa ka entidad pinasikad sa “serious misrepresentation as to what the corporation can do or is doing to the great prejudice of or damage to the general public.”

“The [SEC] has established by substantial evidence that [KAPA] was engaged in an unlawful investment activity,” sumala sa CA, diin nagpamatud-an sa resulta sa imbestigasyon sa SEC nga ang maong pagpang-solicit ug donasyon sa KAPA nilangkob isip pagtanyag o pagbaligya og securities pinaagi sa investment contracts. Ang kakuwang sa permit aron motanyag og securities sa publiko usa kini ka kalapasan sa Republic Act No. 8799 kun Securities Regulation Code (SRC).

“Pastor Apolinario cannot deny that KAPA is engaged in any solicitation or investment scheme,” gipasabot sa CA. “In one of the investigations of [the SEC], several platforms were used by [KAPA] in social media with Pastor Apolinario excessively talking about KAPA’s investment scheme and how to earn profits from it,” dugang nga punto sa CA.

Gidugang usab sa appellate court nga ang pagbakwi sa certificate of incorporation sa KAPA sakto ug matarong. Gisalikway usab sa CA ang giingon sa KAPA nga gisupak sa SEC ang temporary restraining order (TRO) gikan sa Regional Trial Court sa General Santos City, Branch 35 diin mipagawas kini og order of revocation samtang ang TRO gipatuman.

Ang maong TRO nga gi-issue niadtong Marso 19, 2019, nagmando sa SEC sa dili pag implementar sa cease and desist order (CDO) batok sa KAPA nga gi-isyu niadtong Pebrero 14, 2019.

Apan sumala sa CA, ang pagpagawas og TRO kulang og legal nga basehan tungod kay kini nanghilabot sa pagpatuman sa SEC sa iyang gahum ug katungdanan.

Ang Seksyon 179 sa Republic Act No. 11232 o Revised Corporation Code sa Pilipinas nag-ingon nga walay korte ubos sa CA ang adunay hurisdiksyon nga mo-issue og restraining order nga direkta o indirekta nga manghilabot sa pagpatuman sa gahum, katungdanan ug responsibilidad sa SEC nga diin nahasulod “exclusively” sa iyang hurisdiksyon.

Dugang pa, ang CA mibasura sa giangkon sa KAPA nga ang SEC maoy nakalapas sa iyang katungod sa due process sa dihang wala kini mokonsidera sa mga sulat nga ilang gipadala sa dihang wala pa ma-implementar ang revocation order, ug ang pagdeklara niini og permanenteng CDO nga wala paminawa ang ilang tingog.

“It must be stressed that the SEC decision was not rendered merely to terminate the existence of petitioner as a religious institution but because it committed serious acts of misrepresentation to the prejudice of the general public by soliciting investments in the guise of a donation with a promise of a 30% return of profits every month,” sumala sa appellate court.

Mahinduman, human nga mabakwi ang corporate registration sa KAPA ang hiniusang pwersa sa National Coordinating Agency, Philippine National Police, Philippine Army ug Philippine Coast Guard mi-aresto si KAPA Founder ug President Joel A. Apolinario didto sa Lingig, Surigao del Sur niadtong Hulyo 21, 2020.

Marso sa susamang tuig, ang Cagayan de Oro Regional Trial Court mipagawas usab og arrest warrant batok ni Apolinario tungod sa kaso nga syndicated estafa nga usa ka non-bailable offense.

Ang uban nga nag-atubang sa susamang kaso mao sila Junnie G. Apolinario, Maria Pella B. Sevilla, Cristobal R. Barabad, Nonita S. Urbano, Nelia V. Nino, Jouelyn A. Del Castillo, Joji A. Jusay ug Albert P. Buhangbuhang.

Ang Bislig City Regional Trial Court Branch 29 mipagawas usab og warrants of arrest batok ni Apolinario, KAPA Corporate Secretary Reyna L. Apolinario, Trustee Margie A. Danao ug mga promoter nga sila Reniones D. Catubigan, Marisol S. Diaz, Adelfa Fernandico ug Moises Mopia, tungod sa paglapas sa SRC.

Samtang ang Department of Justice (DOJ) niadto pang Septyembre 2019 miuyon sa findings sa SEC ug gipasakaan og kaso niini ang KAPA, sila Mr. and Mrs. Apolinario, ug Margie Danao sa paglapas sa Sections 8(8.1), 26.1, ug 28 sa SRC. Ang DOJ mipasaka usab og kaso batok ni Diaz ngadto sa Antipolo Regional Trial Court tungod sa kalapasan sa Section 28 sa SRC.

Susamang mga kaso usab ang gipasaka batok ni Mopia ug Fernandico ngadto sa Quezon City Regional Trial Court Branch 93, nga mao usab nagpagawas og warrant of arrest batok kanila niadtong Disyembre 2, 2019. Ang duha ka kaso padayon pang gipaminaw. (PR)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.