By Rey Anthony Chiu, PIA-Bohol | 02:22 PM April 22, 2020

Aron hingsakpan kon duna ba gayu’d nagpalusot ug naghatag og pabor sa pagpang-apud-apod sa Social Amelioration Program (SAP) nga sukip sa Bayanihan To Heal As One Act, gimandu sa Department of the Interior and Local Government (DILG) ngadto sa mga kapitanes sa barangay sa pagpadayag sa mga nakadawat sa hinabang nga salapi.

Kini unod sa mandu ni DILG Secretary Eduardo Año sa iyang panawagan sa kinatibuk-an nga dayag nga pagmantala sa listahan sa mga nakadawat sa SAP alang sa pagpalig-on sa kamatinud-anon, dayagug sihag lakip na ang hapsay nga pagdumala sa financial subsidy sa kagamhanan nga gipatuman sa Department of Social Welfare and Development (DSWD).

Matud ni DILG Sec Año, ang listahan sa mga nakadawat kinahanglan nga tataw nga ipapilit sa us aka pahibalo nga iplastar sa barangay hall, city/municipal hall, mga lugar taokanan o social center, gymnasium, auditorium, terminal sa panakyanan, merkado market, health center, ospital, ug susamang mga lugar pangpubliko.

Kini sanglit buot sa kagamhanan nga mamahimong sihag ang pagtumbok kon kinsa ang mga nakadawat sa tabang ilawom sa SAP.

Subay niini, matud sa DILG nga ila na nga gimanduan ang mga kapitan o punong barangay sa pagpaublikar ug pagmantala sa masterlist sa mga nakadawat o makadawat sa hinabang aron ang mga residente masayud kon kinsa sa barangay ang nakadawat o makadawat pa sa mga hunabang.

Mahinundanon kayo nga ikamantala ang mga listahan aron ang kadaghanan masayud ug madan-agan sa proseso sap ag-ila kon kinsa ang labing nanginahanglan nga walay lain nga gisaligan sa kapanginabuhi-an karon nga may pagkapalta sa panarbaho tungod sa mga lakang batok sa COVID.

Kahinumduman nga ang Social Amelioration Program gipatuman aron pagaanaon ang kabug-at sa epekto sa enhanced community quarantine ngadto sa labing apektado nga sector sa katilingban human napatuman ang pagpaningkamot nga kapugngan ang pagtakud sa kagaw nga angpasira usab sa mga trabaho-an.

Matud sa DILG, tumong usab nila sa mandu ang pagpaneguro sa kabarangayan nga may tukma ug kompleto nga listahan sa mga benepisaryo, kay kon masayran nga kuwang pa gayud ang naa sa listahan sa mga tabanganan, makahimo dayun ang LGU sa mga lakang aron kini nga panginahanglan, matubag pinaagi sa pagpahibaw na usab sa DSWD.

Dugang sa DILG, nga ilang gipagawas ang mandu human usab nila mabati ngug madawat ang mga taho nga daghan ang mireklamo kay dili dayag ang pamaagi sa pagpanglista ug pag-pangapud-apod sa pinansyal nga tabang.

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.

%d bloggers like this: