By Rey Anthony Chiu/PIA-Bohol | 08:52 PM March 04, 2020
Migawas nga pakyas ang saad sa mga ngapasiugda sa Escuella Taller, usa ka programa unta nga maghatag og dugang kahanas sa kapanginabuhi-an sa mga Bol-anon nga wala maka-eskwela.
Ang Escuella Taller (ET), us aka proyekto nga dala sa usa ka Espanyol nga non-profit non-government organization nga mosulod dinhi sa Bohol human sa linug sa 2013.
Sa nangaguba nga mga karaang butang ug mga kapanulundan, ugsa nagkadaku nga panginahanglan sa mas maayo nga abilidad sa pagpanarbaho, misulod ang ET sa Bohol aron tubagon ang duh aka suliran human sa linog: ang pagpahiuli sa mga nangagupok nga kapanulundan ug ang paghatag paglaum sa mga batan-ong wala kaeskwela o Out of School Youth (OSY).
Tumong usab sa ET ang pag-gamum sa mga kabataan nga out os school nga makapangitag kinabuhi-an pinaagi sa mga katakus nga itudlo sa ET, pasabut ni Rev Fr. Jingboy Saco, sa parokya sa Santa Cruz ug San Vicente Maribojoc, diin didto ipahimutang ang unang bansay sa ET.
Lakip sa mga bansay sa mga out-of school youth sa Bohol nga miapil sa ET mao ang pagkulit sa kahoy ug table, alang sa pagpahiuli og usab sa mga nangagupok nga mga retablo, altar, nga imahen sa santos nga kahoy nga nangadaut sa linug ug ang pagpamanday.
Alang sa mga bato nga simbahan, may nagbansay usab sa pagkulit sa bato ug sa paghimo og timableya nga bato, apil na ang pagkulit sa mga desinyo nga kasagaran makit-an sa mga arko ug pultahan sa mga karaang simbahan.
Gawas sa pagkulit sa bato, gitudlo-an usab ang mga OSY sa pagpangmason.
May mga batan-on usab ang gitudloan sa pagpintal sa estampa, ug sa lukop nga pagpintal, sa tinguha nga sila ang magamit sa pagpahiuli sa mga alkoba ug sa mga bongbong sa simbahan nga nangaguba sa linug.
Apan, matud ni Feliz Ladeza, 23 anyos ug taga Loon, daghan na sa ilang mga nakahuman sa bansay sa ET ang milahos na lang sa pagtrabaho sa mga malls, sanglit wala’y mikuha kanila nga mga kontraktor nga nagtrabaho sa pagpahiuli sa mga simbahan nga nangaguba.
Kini bisan pa nga daghan pa nga mga simbahan sa Bohol ang kasamtangan nga gipangtrabaho.
Unta, napahimutang sa mga kasabutan kaniadto nga ang mga gradwado sa ET, maoy gamiton sa mga kontraktor nga naghimo sa pagpahiuli sa mga simbahan, sugyot sa usa ka tigpaniiad kinsa nakakita na sa epekto sa katakus sa mga nabansay sa ET.
Hinuon, sa Maribojoc, sa kapin na sa 40 ka OSY nga migraduate sa ET, may pipila lamang kanila nga nagtrabaho na sa gitukod pag usab nga simbahan, apan kini pipila lamang sa mga nakahuman na sa bansay.
Niini usab, may pipila ka mga graduate sa ET nga milaum pa gihapon nga ang saad nga gibungat kaniadto sa pag-aghat kanila nga mobansay sa ET, mamahimong tinuod, ug ang kagamhanan motabang sa pagpahiluna kanila nga may miturok na unta nga paglaum, apan, kasamtangan nga nalawos.
