By Rey Anthony Chiu/PIA-Bohol | 10:23 PM December 16, 2019
Bukas na usab ang application alang sa Civil Service Commission (CSC) Pen and Paper Test sugod Disyembre 15 ug kini magpabilin nga bukas hangtud mapuno ang slots sa dili pa ang pagtak-op sa Enero 15, 2020.
Kini alang sa eksaminasyon sa Marso 15, 2020.
Kini segun pa sa information officer sa ahensya, nga si Ma. Liezl del Rosario, didto sa labing bag-o nga panagtapok sa Association of United Development Information Officers, didto sa Vita Isola Leisure Farm Resort, Sandingan Island, Loon, Bohol, Disyembre 10.
Ang pagkapasar sa eksaminasyon sa CSC, maoy labing una nga panginahalan sa usa ka tawo nga buot mangempleyo sa bisan hain man nga posisyon sa gobyerno.
Ang gobierno pa gihapon ang labing dako nga employer sa tibuok nasud, segun sa datus sa Department of Labor and Employment, ug kini pa usab ang may labing dako nga aghat sa mga buot manarbaho dala sa haylo sa seguridad sa pagpanarbaho.
Hinuon, limitado lamang ang slots alang sa mga moeksamen dinhi sa Bohol, dugang ni del Rosario.
Ang Bohol natumbok na usab nga usa sa mga testing centers sa Regional CSC alang sa ilang pem and pencil tests. Apan dinhi sa Bohol, ang CSC magpahigayun lamang sa eksaminsayon sa tulo ka eskwelahan: Dr. Cecilio Putong National High School, Bohol Island State University ug sa BIT International College.
Ug aron kalikayan ang kasagaran na nga mahitabo nga masirad-an nga sa application ug testing slots, aghat sa CSC, sayoha og duso ang aplikasyon.
Samtang ang forma sa aplikasyon makuha sa CSC Tagbilaran, dili una pirmahan ug butangan sa tamla sa tudlo kay kini kinahangkang himoon atubangan sa taga CSC, giawhag na usab sa ahensya ang mga interesado nga mokuha sa eksaminasyon sa pag andam og valid identification card nga may adlaw natawhan, passport sized nga hulagway nga ipataban sa aplikasyon ug documentary stamps sa pagduso sa aplikasyon.
