By Rey Anthony Chiu/PIA-Bohol | 02:23 PM December 06, 2019
Ilusad, karong adlawa dinhi sa Bohol ang kampanya nga nagtumongvsa pagpabalik sa disiplina alang sa mas malungtaron nga pag-ugmad sa nasud.
Pangunahan sa Department of Interior and Local Government (DILG) -7 Central Visayas uban ni Regional Director Leocadio T. Trovela ang kampanya nga nanawagan sa publiko sa pagbansay sa disiplina atul sa Disiplina Muna National Advocacy Campaign dinhi sa Bohol Tropics Resort, Disyembre 6.
Ang paglusad dinhi sa Bohol maoy labing una nga paglusad nga gihimo sa rehiyon human ang kampanya gilusad didto sa Manila pipila ka adlaw na ang minglabay.
Tumong sa Disiplina Muna ang katawhan nga disiplinado ug manggitinahuron sa balaod ug diin ang gimithi nga kausaban may tataw nga kasugdan.
Daghan ang nanawagan sa kausaban apan kasagaran niini, gisalig lamang sa kagamhanan.
Matud sa DILG, ang kabag-ohan magsugod usab sa napabag-o nga hunahuna ug kinaiya nga kapuy-an sa matuod, lukop ug motunhay nga kaugmaran.
Una nga gipasugdan pinaagi sa nasudnong paglusad niadtong Nobyembre 6, 2019 didto sa Metro Manila, sa Disiplina Muna, milaum ang kagamhanan nga kini magpasugod sa pagpabalik sa kinaiya ug kultura sa disiplina sa mga katawhan nga Pilipino isip pamaagi sa pag-aghat sa katawhan nga manginlabut alang sa tunhay nga kalambuan ug pagpalapad sa kalinaw ug kahapsay.
Kini usab ang panglantaw sa administrasyon ni Presidente Rodrigo Duterte nga nagduso sa pagtambayayongay sa kagamhanan ug katawhan alang sa kausaban.
Misalig and administrasyon ni Duterte nga ang pagpa-asdang sa maayo nga kinaiya sa katawhan ug sa ilang responsibilidad sa pagpanday sa lig-on nga nasud, mag-aghat kanila sa pagpanginlabut sa mga proseso sa kagamhanan nga maoy dagway sa maayong pagdumala sa pangagamhanan.
Ang Disiplina Muna nagtutok sa pagpatuman sa mga kampanya sama sa paghawan sa mga babag sa mga kadalanan, pagpangandam sa katalagman, kampanya batok sa pagpanigarilyo ug pagpanabako, pagpasayun sa pagaugod sa pamuhunan, pagpa-undang sa paghuboghubog, paglimpyo sa mga lugar nga gibisita sa mga turista ug ang maayo ng pagpadagan sa Barangay Anti-Drug Abuse Councils.
Ang kampanya sa Bohol nagtumong sa pagpasugod niini sa mga kabataan, batan-on nga propesyonal, ug sa lapad nga katawhan.
Aron mapalapad pa kini, nakig-abin ang DILG sa mga nasudnon ug lokal nga mga ahensya, pribadong sektor, kahugpungan sa katilingpan ug mag sakop sa prensa.
Dinhi sa Bohol, ang paglusad sa Disiplina Muna, ubanan sa bukas nga paglagda sa mga panaad nga sugdan ug suportahan ang pagkadisiplinado, ug kini apilan sa mga lokal nga opisyales sa Bohol, mga mayor ug bise mayor, mga konsehal, mga estudyante, mga kahugpungan, mga negosyante ug daghan pa nga sektor sa katilingban.