By Rey Anthony Chiu/PIA-Bohol | 10:53 AM December 05, 2019
Kon walay lain nga kakuli-an nga magpanghitabo gikan karon hangtud sa Disyembre 16, subhan pinaagi sa Simba sa Kaadlawon ang napahiuli nga simbahan sa parokya sa Santo Nino sa Cortes.
Kini maoy gibutyag ni Rev. Padre Roderick Pizarras, kura paroko sa Cortes ug usa sa mga nagtutok aron matibawas ang proyekto sa pagpahiuli sa simbahan nga naguba niadtong linug sa 2013.
Daghan na nga mga taga Cortes ang dili makatuo nga mahibalik pa ang simbahan sanglit sa dagway sa pagkahugno, minilyon ang gikinahanglan aron ipabalik ang dagway nga nagusbat human sa linug.
Apan, wala man maipadayag sa kadaghanan, pipila ka adlaw sa wala pa mahitabo ang linug, nadeklara na ang karaang simbahan nga bato sa Cortes nga mihinungdanong kulturanhong kabtangan (Important Cultural Property) sa National Museum.
Kauban sa pipila pa ka mga simbahan nga nangahugno ug nangahunlak sa linug, ang simbahan sa Santo Nino sa Cortes, gipundohan usab sa nasudnong kagamhananaron ikapahiuli kini sa karaannga dagway.
Kahinumduman nga niadtong Disyembre 3, 2017, gilubong ang time capsule nga nag-limin sa mga plano sa pagpahiuli sa simbahan nga apektado sa linug.
Niadto usab nga adlaw, gisugdan ang pagtrabaho sa naguba nga simbahan.
Unom ka tuig ug duha ka buwan nga hinglabay gikan sa pagka lumpag ug duh aka tuig human sugdi ang pagtrabaho aron ikapahiuli, andam na ang National Museum ug ang kontraktor nga 401 Development Corporation nga itugyan pagbalik ang simbahan sa Diyosesis ug sa parokya sa Cortes.
Gawas nga gibalik ang karaan nga porma ug dagway sa simbahan, gipahiuli usab kini segun sa karaan nga desinyo nga labing duol sa dagway niini niadtong siglo 18 dihang gipabarug ang simbahan sa tumoy sa bungtod.
Gitang-tang na usab ang mga bag-ong parte sa simbahan nga maoy nakadaut sa integridad niini, sama sa grotto nga naa habin sa pako niini nga naa sa tuo, samtang gipahiuli na usab ang natandog nga bunyagan.
Gipahiuli na usab ang mga larawan nga gipintal sa mga alkoba niini, samtang gipabatug og balik ang karaang altar nga napisa-pisa niadtong milabay nga linog.
Gawas sa simbahan, gipahiuli ug itugyan usab pagbalik nagdto sa Diyosesis ang karaan nga kombento samtang gipahiluna ang tukmang mga suga, ug awasanan sa tubig aron dili na mahumokan ang simbahan, ilabi na kon may uwan.
Subay niini, hinay-hinay na nga nagkaporma og balik ang gipahiuli nga simbahan sa parokya sa Santo Nino, alang sa pasiuna nga pagtugyan niini, Disyembre 16, dugang ni Fr Pizarras.
