By Rey Anthony Chiu/PIA-Bohol | 12:18 November 15, 2019
Sa dili madugay, maapil na ang lungsod sa Ubay sa mga local nga kagamhanan nga magdumala sa ilang kaugalingon nga tunghaan sa kolehiyo.
Gitaho sa Information Officer sa Ubay nga si John Larry Evangelista didto sa tigum sa Association of United Development Information Officers (AUDIO) nga gihost sa Ubay nga padayon na ang lungsod sa pagproseso sa mga papeles aron ikapabarug ug kasugdan na nila ang kaugalingong kolehiyo sa lungsod.
Kon matuman, maha-apil na ang lungsod sa mga kalungsuran nga may kaugalingon nga tunghaan sa kolehiyo sama sa Trinidad, Buenavista ug Tagbilaran City.
Ang taho ni Evangelista, nahitabo, usa ka adlaw human ang Technical Working Group sa lungsod alang sa maong plano, nagkatigum aron mahulma ang mga gimbuhaton ug himoonon aron mapadali ang katukoran sa ilang plano.
Ang TWG nga tigum gipangunahan ni Sangguniang Bayan Committee on Education Chairman, Kagawad Constancio Atuel, Department of Education District Supervisor Dr. Maya Tumalon, Treasurer Elizabeth Pabellan, Consultant Al Bentulan, Executive Assistant for Education Dr. Maria Reyes.
Technical Education Skills Development Authority Assistant Coordinator Ale Golosino, TESDA Registrar Myla Palmero ug Municipal Administrator Edwin Reyes.
Dugang ni Evangelista, nga natumbok na gani sa mga tinugyanan sa lungsod ang lugar diin ipabarug ang Municipal College.
Subay usab niini, gidugang pagtaho didto sa tigum nga naglawig na ang aplikasyon sa Ubay aron mamahimo na nga Science City.
Gipakadak-an sa lungsod ang napahimutang na nga mga pasilidad sa nasudnong kagamhanan ilabi na alang sa natad sa research and development sa natad sa pagseguro sa food security pinaagi sa panguma.
Matud pa sa tinubdan nga moqualify na ang Ubay sa daghan nga mga rekisitos aron matimbang na ang mga dokumentos nga magpamatuod sa ilang damgo.
Hinuon, may tulo pa ka rekisitos nga kadudahan pa nga macomply sa Ubay,a ron isipon sila nga science City sama sa Science City of Munoz.
Wala pa gihapon makaabut ang populasyon sa Ubay ngadto sa 100,000, kuwangan pa ang kita sa lungsod aron makaabut sa P100 milyones nga kita ug may dako pa nga suliran sa lungsod ang tubig.
