By Rey Anthony Chiu/PIA-Bohol / 07:30 PM October 1, 2019
Dala sa nakaschedule nga maintenance activities sa National Grid Corporation of the Philippines (NGCP), angay pangandaman ang posible nga 14 ka oras nga pagkabalda sa serbisyo sa suga nga dagitab.
Karon’g umaabut nga Sabado, Oktubre 5, apektado ang tibuok Bohol, sanglit ang maintenance activities kalabut sa tinuig nga preventive maintenance sa Maasin-Ubay-Corella 138 KV nga linya ug ang pagtesting sa mga high voltage nga mga ekipos subay niining serbisyo, matud ni NGCP spokesperson Betty Martinez.
Tungod niini, mahimong apektado ang Bohol Light Company Incorporated, Bohol Electric Cooperative 1 (BOHECO I) ug BOHECO II.
Ang pagkapawong sa serbisyo sa suga ug koryente magsugod sa alas 4 sa kaadlawon ug molanat ngadto sa alas 6 sa sayong kagabhion, pasidaan ni Martinez.
Pinaagi niining pahibaw, gilauman nga ang mga katawhan nga may mga laraw na nga daan, gitambagan nga magpahimutang na sa mga pagpangandam aron walay panahon nga masayang.
Hinuon, gipasalig sa NGCP nga kini maningkamot sa sayo nga pagpabalik sa serbisyo ug sa pagpahiuli sa mas saju nga panahon, kon dili man ugaling matuman segun sa naschedule nga pagbalik.
