Text and Photos By Rey Anthony Chiu, PIA-Bohol | 07:10 PM September 12, 2019
Alang sa mga mahiligon modagan, gitanyag sa Kagamhanan sa Lalawigan sa Bohol, United Nations World Tourism Organization, City Government sa Tagbilaran ug sa Bohol Tourism Office uban sa Bohol Marathoners Club ang World Tourism Day Run 2019, karong Septembre 27, 2019, adlaw nga Biyernes.
Ang lumba nga bukas alang sa 5 kilometer ug 10 kilometer distances, magsugod ug mahuman usab sa bag-ong Kapitolyo Probinsyal, segun pa sa mga tigpasiugda.
Matag tuig man nga gisaulog sa Bohol ang World Tourism Day, karon lang nga tuig nga ang pagsaulog ato nga gigawas sa Bohol Cultural Center, ang kasagaran nga venue sa tinuig kalihukan, segun pa ni Cristopher Boncales, sa Bohol Tourism Office.
Niini usab nga kalihukan nga gigawas sa silong sa Cultural Center, ato nga gi-anunsyo sa dako nga kalipay ngadto sa mga Bol-anon, ang saad sa bag-ong administrasyon sa hugot gihapon nga suporta sa turismo, dugang niya.
Gawas nga maayo alang sa pagmintinar sa kahimsug, ang pagdagan ug pagsalmot sa World Tourism Day Run dako og ikahatag sa mosalmot, pasalig sa mga tigpasiugda.
Sa pagrehistro sa P 450.00 alang pananglit sa 10 kilometer distance, kini nagtaban na sa Race Bib, libre nga event shirt, finisher’s medal ug McDonalds Breakfast lakip na ang kahigayunan nga mahubotan sa raffle diin may makahinam nga premyo.
Sa 5 kilometer distance, ang rehistro tag P 350.00 apan aduna na kini Race Bib, Event Shirt, McDonalds Breakfast ug tsansa nga moadaug sa raffle.
Gisaad usab nga may premyo ang Champion, second ug third alang sa Male ug sa Female category sa 5 kilometer ug sa 10 kilometers, samtang may mga special awards pa usab nga mahimong dag-on.
May mga special awards alang sa: labing daghan nga misalmot sa lumba gikan sa mga eskwelahan, labing daghan nga misalmot gikan sa usa ka hotel ug resort, labing edaran nga misalmot, labing bata nga misalmot, ang unang magti-ayon nga maka-abut sa finish line, magsasalmot nga may labing nindot nga gisul-ob, labing sexy nga lalaking runner, labing sexy nga babayeng runner ug daghan pang awards.
Ang registration nagsugod na ug hangtud lamang sa Septembre 20, 2019 ug kini mahimo nga adto sa Bohol Tourism Office sa Governor’s Mansion, Kew Hotel, McDonalds J.A. Clarin, ug sa Petron Gasoline Station sa CPG Avenue.
Alang sa mga buot na nga mosinati sa ruta sa dagan, ang 10k magagikan sa Kapitolyo ug adto moliko balik sa Kapitolyo sa may Petron Gasoline Station sa eskina paingon sa Cabawan.
Sa adlaw sa lumba, ang 10 kilometer distance magsugod sa alas 5:00 sa sayong buntag.
Alang usab sa modagan sa 5k, gikan sa Kapitolyo, ang liko-anan pabalik mao ang Fitness Brigade Gym duol sa karsada sa simbahan sa Dao.
Sa adlaw sa lumba, motabok sila sa starting line sa alas 5:30 sa sayong buntag.
Dugang sa mga tigpasiugda, sa Septembre 25 ug 26, 2019 pa makuha ang race kits, sa mga oras nga alas 9:00am ngadto sa alas 4:00 pm didto sa Bohol Tourism Office, sa Governor’s Mansion.
Sa pagkuha usab sa race kits, ihulog ang tumoy sa ilang registration stub sa drop box, kay kini maoy basehan sa raffle draw, sa adlaw sa lumba.
Busa, unsa pay gipaabut, rehistro na.
