Mga Bol-anon giawhag sa pagbisita sa Bohol Museum kay libre kini.
Pormal na nga gitugyan sa kagamhanan sa Bohol ngadto sa National Museum ang mga papeles nga nagsaysaysa pagdonar sa kanhi Tribuna ug nahimong karaang Kapitolyo aron himoon nanga museo dinhi sa Bohol.
Mismo si Gobernador Edgar Chatto ang mitunol sa mga papeles sa donasyon ngadto kang National Museum (NM) of the Philippines Director Jeremy Barns samtang gisaksihan usab ni NM Deputy Director Anna Labrador, atul sa pagsaulog sa Bohol sa ika-121 nga kasumaran sa kaugalingnan sa nasud, Hunyo 12.
Kahinumduman nga ang karaang Kapitolyo napabarug niadtong 1855, ug nahimong sentro sa pangagamhanan sa Bohol human natukod isip Tribuna hangtud nga gihimong Kapitolyo sa ulahing mga katuigan.
Apan ang karaan nga gambalay nga hinimo sa bato ug karaang mga kahoy, naguba sa milabay nga linug niadtong Oktubre 15, 2013.
Una na nga nadeklara sa National Museum isip Important Cultural Property (ICP) sa nasud, ang karaang gambalay nga bato ugl ig-on nga kahoy, nakakuha og pundo gikan sa nasudnon nga kagamhanan sa pagpahiuli niini ngadto sa iyang naturalisa nga dagway.
Tulo katuig human ang linug sa 2013, gitapos sa NM ang pagpahiuli ngadto sakaraan niini nga porma ang nahugno sa linog nga gambalay, apan, niadtong panahona, nakahukom na ang mga opisyales sa Bohol nga magtukod nalang sa bag-o nga Kapitolyo aron mas mapabilin ang integridad sa napahiuli nga karaang building.
Karon, gihimo na nga sanga nga buhatansa NM dinhi sa Bohol, ang karaang Kapitolyo nga napiulina, gidonar nasa Bohol ngadto sa NM aron ipadayon ang ilang presensya dinhi sa Bohol.
Sa pagtugyan sa karaang gambalay ngadto sa National Museum, nagpasalamat si Barns dungan sa pag-aghat sa mga Bol-anon nga mosuroy sa museum kay libre kini ug didto masayran ang taas nga lanat sa mabulokon nga kasaysayan ug kalikopan sa isla nga lalawigan.
Sa susamang adlaw sa pagtugyan sa mga papeles, gibuksan usab sa NM ang exhibit on Natural History sa Bohol didto sa Governors Gallery sa ikaduha nga andana sa museo.
Ang pagtugyan sa mga papeles gisasksihan nila ni Board Member Vincenzo Arcamo, Administrator Alfonso Damalerio II, BalilihanMayor Pureza Chatto, Board Member ug karon Representative Alexie Tutor, Board Members Ricardo Masamayor, Abeleon Damalerio ug Victor Bolos Jr. Report gikan ni Rey Anthony Chiu/PIA-Bohol
