By PR | 07:59 PM June 17, 2026
TAGBILARAN CITY, Bohol—Nakab-ot sa lalawigan sa Bohol ang 100 porsiyento nga passing rate sa Good Financial Housekeeping (GFH) Assessment alang sa Calendar Year (CY) 2025.
Ang provincial government of Bohol, uban sa Tagbilaran City Government ug tanang 47 ka local government units sa tibuok Bohol ang nakakuha sa financial management ug transparency standards sa Department of the Interior and Local Government (DILG).
Kini human gipagawas sa DILG ang listahan sa mga LGU nga malampusong nakapasar sa GFH Assessment niadtong Marso 9, 2026, nga nag-ila sa ilang pasalig sa accountability, transparency, ug maayong pagdumala sa piskal.
Ang GFH usa ka mekanismo sa pag-ila sa DILG nga nag-evaluate sa mga LGU base sa pagsunod sa mga kinahanglanon sa pagdumala sa pinansyal ug transparency.
Nagsilbi kini nga timailhan sa responsable nga pagdumala sa piskal ug pagsunod sa mga kasamtangang balaod, lagda, ug regulasyon.
“Kini nga kalampusan maoy pamatuod sa atong lig-on nga paningkamot sa pagpalambo sa matinud-anon, transparent, ug responsable nga pagdumala sa gobyerno. Pinaagi sa tukmang pagsunod sa Full Disclosure Policy ug sa mga rekisitos sa Commission on Audit, atong napakita nga seryoso kita sa maayong pagdumala ug sa hustong paggamit sa pondo sa katawhan,” matud pa sa usa ka pahayag ni Gob. Ericio Aristotle Aumentado.
Gi-awhag niini ang tanan nga magpadayon sa pagserbisyo nga adunay integridad ug responsibilidad.
“Magkahiusa kita sa pag-abante alang sa mas lig-on, mas mauswagon, ug mas maayong Bohol,” awhag pa ni Aumentado.
Aron mahimong kwalipikado, ang LGU kinahanglang makakuha og Unmodified o Qualified Audit Opinion gikan sa Commission on Audit (COA) ug mosunod sa Full Disclosure Policy (FDP), pagsiguro nga tukma sa panahon ug kompleto nga pag-post sa pinansyal nga mga dokumento.
Kini nga kalamposan nagpakita sa hiniusang pasalig sa mga LGU sa Bohol sa disiplina sa panalapi, transparency, ug tulobagon sa serbisyo publiko. (ECB/PIA-7 Bohol)
