Ni I. Inojales | 12:05 PM Pebrero 27, 2026
PANGLAO — Ang suspek sa pagpangawat sa bag sa usa ka magtiayon nga Taiwanese sa Alona Beach sa Panglao niadtong Domingo sa gabii, gikatahong nakita nga kalma lang nga nag-inom og usa ka botelya sa Red Horse beer sa duol nga tindahan pipila ka gutlo human sa insidente.
Nahitabô ang kawat sa gabii sa Pebrero 22, 2026, samtang nagkaon ang magtiayon daplin sa baybayon sa Alona Beach sa Panglao.
Usa ka wala mailhing lalaki ang giingong mikuha sa ilang bag ug midagan palayo. Sa maong gabii usab, narekober ang cellphone sa magtiayon human kini makaplagan nga gilabay sa usa ka masabakan nga lugar.
Sumala sa mga saksi, human sa insidente miadto ang suspek sa usa ka duol nga tindahan, mi-order og Red Horse, ug daw walay kabalaka sa nahitabo.
Nakapauli na sa ilang nasod ang magtiayon nga Taiwanese human usab marekober ang ilang mga pasaporte nga giingong gilabay sa suspek.
Padayon ang operasyon sa kapulisan, uban sa ubang ahensiya sa gobyerno ug mga boluntaryo, sa pagpangita sa nahibiling gikawat nga butang ug sa pagdakop sa suspek.
Kagabii nagpahibalo si Gov. Erico Aristotle Aumentado nga naghatag ang Kapitolyo sa Bohol og P150,000 nga pabuya alang sa bisan kinsa nga makahatag og kasaligan nga impormasyon nga mosangpot sa pag-ila ug pagdakop sa suspek.
