By BIN Staff | 01:30 PM May 06, 2025
Gipasakaan og complaint for disqualification si reelectionist Garcia Hernandez Mayor Filadelfo Jess Baja tungod sa giingong pagpangampanya atol sa pagpang-apod-apod sa financial assistance nga assistance to individuals in crisis situation (Aics) sa gobyerno sa nakalabay’ng buwan sa Abril.
Ang kandidato sa pagkamayor, Jade Bautista Acapulco ug kandidato sa pagkabise mayor Mary Rose Edubas, ang nipasaka og kasong diskwalipikasyon batok ni Mayor Baja ug sa mga kaubang kandidato niini sa grupong One Gaher kagahapong adlawa, Biyernes, Mayo 2, sa Provincial Commission on Election Office sa Bohol.
Sa complaint ni Acapulco ug Edubas, ilang gihangyo ang poll body nga i-disqualify si Baja gumikan kay nangampanya kini atol sa gihimong distribusyon sa Aics niadtong Abril 30, 2025 didto sa Municipal gymn sa Garcia Hernandez, Bohol.
Gidawat ni Provincial Comelec Supervisor Atty. Eliseo Labaria ang reklamo ni Acapulco ug Edubas, kinsa tandem sa May 12 midterm election.
Apil sa gipasakaan og disqualification case ang entiro slate ni Baja, human mitambong sa Aics distribution, nga sila si vice mayoralty candidate Antonia Ladaga, ug mga kandidato sa pagka-konsehal nga sila si An Paglinawan Baja, Antonio Virtudazo Baja, Edwin Virtudazo Baja, Lito Oclarit Dajalos, Edgar Bachinila Galbizo, Nilo Gallentes Salise, Carol Tejano Tentativa, ug Editah Ido Virador.
Giduso usab nila ni Acapulco ug Edubas ang video sa campaign speeches ni Baja nga nikaylap sa social media nga Facebook.
Wala lay opisyal nga pamahayag si Baja.
