By PIA-Bohol| 11:21 PM May 05, 2025
Giaghat sa Department of Trade and Industry ang mga establisemento nga napili nga hatagan sa Bagwis Awards nga pamaayohon pa ang ilang pagpadagan sa ilang negosyo ilabi na sa pagpalig-on sa ilang relasyon sa konsumidor, aron dili na mosaka pa ngadto sa komplikado nga sitwasyon ang mga reklamo sa mga konsumidor ug mamalitay.
Pinaagi ni Mary Lou Torreon, officer in charge ug Division Chief sa DTI Bohol Consumer Protection Division, giaghat sa goberno ang mga establisemento nga nakadawat sa ilang citations isip Bagwis Awardee nga mintinahon sa tulo ka tuig ang kamaayo sa pagpadagan sa ilang mga negosyo aron pwede na usab i-upgrade gikan sa Bronze Award ngadto sa Silver o Gold.
Matud ni DTI Bohol Provincial Director Vierna Teresa Ligan, ang Bagwis Award, us aka pasidungog nga gitanyag sa DTI ngadto sa mga establisemento nga nagpakayag sa kampanya sa katungod sa mga konsumidor, samtang nagpadagan sa ilang mga negosyo diin ang mga mamalitay makakuha sa saktong serbisyo bugti sa ilang gibayran.
Lakip na niini nga programa ang mga superstores supermarkets, department stores ug specialty stores, appliance centers ug hardware ug nga repair shops nga gi-akredit sa DTI.
Tulo ka matang sa awards ang gitagana alang niining mga establisemento: Bronze alangs a mga mingsubay sa balaod sa makiangayon nga patigayon (Fair Trade Laws) ug nagpahimutang og Consumers Welfare Desk; Silver alang sa nakakuha nag Bronze Award unya may kaugalingon nga corporate social responsibility nga dokumentado, ug Gold alang sa nakakuga nag Silver ug may mga pamaagi nga nahanay na sa International Standards Organization 9001, pasabut ni Ligan.
Bronze Awardees ang Du Ek Sam (DES) Incorporated Galeria Luisa, DES Gallares Yamaha, DES JA Clarin Suzuki, DES Lesage, DES Lesage Appliance Center, DES CPG Branch, AH Shoppers Mart Supermarket, AH Shoppers Mart Department Store, Save ‘N Earn Sales Shoppers Branch, Save N Earn Alturas Branch, Save N Earn Talibon, Save N Earn Candijay, Save N Earn Valencia, Save N Earn Loay, Save N Earn Sagbayan, Save N Earn BQ Mall, Save N Earn Loon, Save N Earn ICM Branch, Save N Earn Calape, Save N Earn Guindulman ug Save N Earn Carmen.
Silver Bagwis Awardees usab ang Robinson’s Handyman Inc Tagbilaran City, Bohol, DES H. Grupo Branch, Imperial Appliance Plaza (Tagbilaran Branch), Save N Earn Main Branch ug ang Save N EarnALturas Branch.
