By PIA-Bohol | 08:26 PM March 04, 2025
Aron magtakdo ang eskedyul sa final rate release sa Independent Electricity Market Operator of the Philippines (IEMOP) nga ipagawas matag kinse sa buwan, isibug na ang pagbasa sa mga metro sa mga konsumidor sa koryente dinhi sa franchise areas sa Tagbilaran City, matud pa sa Bohol Light.
Sugod niining buwan sa Marso, 2025, wala pay meter reading nga mahitabo hangtud sa ika 16 ngadto na sa ika 30 o 31 sa buwan, dayag sa Bohol Light pinaagi sa ilang operations division ug inuyonan sa mga opisyales.
Kaniadto, naandan sa Bohol Light Company Incorporated ang pagbasa sa mga metro sa mga konsumidor sa koryente sugod sa petsa 2 ngadto na sa petso 25 sa buwan.
Nunot niini, karong buwana, matud sa pahibalo sa Bohol Light, mahimo nga adunay mga konsumidor nga makasinati og taas nga bayranan tungod sa nainat nga schedule o mubo nga bayranan tungod sa mubo nga serbisyo sa kausaban sa pagbilling.
Tungod usab niining kausaban, sa matag 16 sa buwan, magsugod nag meter reading sa mga nag-una nga accounts sa Bohol Light, lakip na ang mga ospital, nga ahensya ug buhatan sa kagamhanan u gang mga streetlights.
Sa mga commercial nga mga konsumidor, ang Billing magsugod sa petsa 17, samtang gikan sa petsa 18 ngadto na sa petsa 30 ang residential nga mga konsumidor.
Hinuon, gipasalig usab sa Bohol Light nga ang kausaban alang lamang sa Marso ug mao nay sundon alang s aumaabut nga mga buwan.
Alang sa dugang kasayran kabahi niini, tawag o pakisayud sa Customer Care team pinaagi sa hotline nga mga numero, (038) 427-2372, 501-7762, 09209602372, 09223072161 o messenger account sa Bohol Light. (PIABohol)
