By PR | 12:33 PM February 10, 1025
Ang mga representante sa Bohol mibarug sa ilang konstitusyonal nga mandato sa ilang desisyon sa pagpirma sa impeachment complaint batok kang Bise Presidente Sara Duterte.
Sa usa ka hiniusang pamahayag, sila si Edgar Chatto (unang distrito) , Vanessa Aumentado (segundo distrito) , ug Alexie Tutor (tersero distrito) nag-ingon nga ilang gisuportahan ang kadaghanan sa panawagan alang sa sihag ug pagkamay-tulubagon nga pagpangalagad, haum ug pinasubay sa pagtuo sa Konstitusyon nga ang paghupot ug katungdanan sa gobyerno usa ka pagsalig sa katawhan.
“Mibarug kami isip mga miyembro sa among tagsa-tagsa ka politikanhong partido nga aktibong miapil sa matinud-anon nga paningkamot sa Quad-Committee sa miaging mga bulan aron pagsuta sa kamatuoran pinaagi sa ebidensya,” sumala sa ilang pamahayag.
Giklaro usab nila nga ang maong desisyon dili usa ka pag-atake batok sa Bise Presidente ug sa iyang buhatan, apan usa lamang ka pamaagi pagpangita sa kamatuoran.
Ang pagdala sa maong sumbong ngadto sa Senado naghatag karon ug plataporma alang sa Bise Presidente aron makadepensa sa iyang kaugalingon.
Ang Senado, nga molingkod isip impeachment court, ang adunay katungod nga maminaw sa mga ebidensya ug modesisyon sa kaso base sa kamatuoran ug pinasubay sa balaod.
Gipadayag usab sa mga representante ang ilang ligdong nga panlimbasog alang sa maayong panggobyerno ubos sa demokrasya nga nagpanalipod sa mga katungod sa katawhan ubos sa balaod.
