By PIA-Bohol | 09:18 PM February 06, 2025
Sa dili madugay, ang Bohol Light na ang mag-atiman sa mga suga sa kadalanan sa dakbayan sa Tagbilaran.
Kini maoy usa sa mga bag-ong kalambuan nga gipadayag sa kompanya nga ang mayoriya gipanag-iya pa gihapon sa Kagamhanang Probinsyal sa Bohol, human giangkon sa mga tinugyanan sa syudad nga nahimo nilang suliran ang pagpangawat sa mga underground nga wires sa mga koryente nga nagkutay sa streetlights dinhi.
Sa usa ka higayon, nasayran nga daghan nga mga suga sa mga kadalanan sa Tagbilaran ang wala na magsiga kay gipangkawat ang mga linya nga gilatag alang niini.
Ug samtang nagpangita og solbad ang syudad, nalitok ni City Mayor Jane Yap ang hangyo ngadto sa Bohol Light, nga sila na ang magmintinar sa mag streetlights.
Daku kayo ang atong kalipay nga mingsugot ang Bohol Light nga sila na ang moatiman sa mga streetlights, dayag ni Mayor Yap ngadto sa mga sakop sa media atul sa pagbukas sa bag-ong dagway sa kompanya human mapalit ang mayoriya niini sa PrimeElectric Holdings gikan sa Salcon Power.
Hinuon, gipasabut sa Bohol Light nga sila man ang mag-atiman sa mga suga sa kadalanan, ang kagamhanan sa syudad sa Tagbilaran pa gihapon ang mobayad sa konsumo niini, ngadto sa Bohol Light.
Matud ni Mayor Yap nga nalipay usab sila sa syudad tungod kay ang pundo nga gitagana alang sa streetlights, karon mahimo na nga magamit sa laing mga proyekto, nga gikinahanglan usab sa mga taga Tagbilaran.
Alang sa Bohol, si Gobernador Erico Aristotle Aumentado mihangyo usab sa Bohol Light pinaagi sa president ug CEO niini nga si Roel Castro, nga hiposon ang mga linya sa korente ug telepono nga nagbabag sa mga kadalanan palibot sa Plaza sa Tagbilaran ngadto sa Kapitolyo nga karaan.
Sayang kayo nga dili kita makakuha og maayo nga hulagway sa Plaza gikan sa Kapitolyo, o sa Kapitolyo gikan sa Plazatungod sa nagbabag nga mga wires, dayag sa gobernador.
Niini, gisaad usab sa kompnya nga apil ang Kapitolyo nanag-iya, nga ilang himoon ang hangyo sa gobernador. (PIA-Bohol)
