By PIA-Bohol | 10:56 PM January 20, 2025
Giaprobahan sa Bohol Provincial Peace and Order Council (PPOC) samtang gihatagan sa otoridad si Gobernador Erico Aristotle Aumentado nga gamiton ang P40 milyones isip confidential funds o intelligence funds alang sa pagsuporta sa mga proyekto alang sa kahapsay ug kalinaw sa Bohol sa 2025.
Kahinumduman nga pinaagi sa aprobado nga Appropriations Ordinance No, 2024-020, gipahat sa Sangguniang Panlalawigan sa Bohol ang kantidad, isip pagpahiluna sa mga proyekto ug programa nga gilantaw nga magpabarug sa malungtaron nga peace and order sa lalawigan.
Matud ni Department of Interior and Local Government Provincial Director Jerome Gonzales, ang pahat nga P40M, dili gani sagad sa gitugot sa guidelines alang sa Confidential Funds, nga gihuptan sa DILG.
Nunot usab niini, boluntaryo nga gisugid ni Bohol Provincial Police Director sa Police Community Affairs and Development Unit nga si Police Lieutenant Colonel Norman Nuez, nga ang kapolisan maoy labing daku nga benepisaryo sa pagdisburse sa nasampit nga pundo.
Kahinumduman nga sukad si Gob Aumentado ang milingkod sa isip tsirman sa PPOC sa iyang pagkapili isip gobernador, napauso ang pagpanghatag og pabuya ngadto sa mga police units nga makahimo og dinagkong kalampusan ilabi na sa kampanya sa illegal nga drugas ug organisado nga kriminalidad.
Hinuon, wala usab maghisgut ang mga kapolisan kon kini ba usab ang bansay sa PPOC kaniadto sa ubang mga administrasyon, apan, tataw nga mas daghan og mga dinagkong kalampusan ang BPPO sa panahon ni Aumentado kay dagway og may motibasyon sila sa pagpatuman sa mga kampanya batok sa kriminalidad.
Dugang ni LtCol Nuez nga ang impormasyon kalabut sa mga elemento nga kriminal, mahal, apan kinahanglan kini nga may katumbas nga pahinungod, butang nga kasagaran mao usab ang gihimong basehan sa kapolisan sa ilang mga anti-criminality operations.
Atul usab sa hiniusang tigum sa PPOC ug sa Provincial Anti Drug Abuse Council (PADAC), mibarug si Dauis Mayor Roman Bullen aron ipaambit ang iyang kahingawa sa nagkagrabe nga kahimtang sa illegal nga drugas.
Matud sa mayor, nahingawa na siya tungod kay may silingan na siya ug ig-agaw nga gipangpatay, tungod sa paggamit ug pagnegosyo sa illegal nga drugas.
Kahinumduman usab nga ang Dauis, una na nga mingreklamo ngadto sa DILG aron pugson ang sangguniang Bayan sa lungsod sa pagpagawas sa Confidential Funds nga gipugngan sa konseho.
Hinuon, wala usab matino kon ang Confidential Funds sa Dauis, nagpabilin pa ba gihapon nga gihostage, sama sa unang nataho. (PIABOhol)
