By PR | 05:21 PM May 14, 2024
Gipaniguro ni Bise-Presidente Sara Duterte nga mas taas ang oras alang sa pagpanudlo sa mga magtutudlo sulod sa tunghaan.
Gilagdaan ni Bise-Presidente Duterte, sa iyang katungdanan isip Kalihim sa Department of Education (DepEd), ang maong order aron masiguro nga mahatagan og mas taas nga panahon alang sa pagpanudlo ang mga magtutudlo.
Isip sumpay sa una nang gipakanaug nga mando ni Bise-Presidente Duterte diin gikuhaan og mga trabahong administratibo ang mga magtutudlo, iyang gilagdaan ang DepEd Order No. 05 series of 2024.
Tungod kay giila kon unsa ra ang katungdanan nga gitugot kabahin sa pagpanudlo ug unsa usab ang may kalambigitan ra niini, ang maong palisiya nagpalig-on sa Republic Act No. 4670 o Magna Carta for Public School Teachers ug DepEd Order 002 series of 2024.
Gikalipay kinig daku sa mga magtutudlo kinsa sa taas nga panahon maoy nagpas-an sa kabug-aton sa mga trabaho nga nakakuha og dakung oras gikan sa ilang pagpanudlo.
Subay sa mando nga gipakanaug ni Bise-Presidente Duterte, unom ka oras ang gitagana alang sa pagpanudlo samtang duha ra ka oras ang alang sa ubang mga bulohaton nga mahimong adto himoon sa sulod o gawas sa tunghaan.
Ang ubang mga tahas nga way kalabutan sa pagpanudlo o may kalabutan niini mahimong ihatag niadtong mga kawani nga way labut sa pagpanudlo sa mga kabataan.
Ubos kang Bise-Presidente Duterte, ang DepEd maoy labing kasaligan ug gikauyonan nga ahensya sa kagamhanan.
Gawas pa niini, si Bise-Presidente Duterte mao usay labing gisaligan ug nauyonan nga opisyal sa kagamhanan sa tibuok nasud.
