By PR | 01:24 PM April 25, 2024
Personal nga nagpaabot sa iyang pagpasalamat si Bise-Presidente Sara Duterte kang Presidente Ferdinand Marcos Jr. tungod sa padayon nga pagsalig kaniya isip hepe sa Department of Education (DepEd).
“Daghang salamat, Presidente Ferdinand “Bongbong” Marcos Jr. sa nagpadayon nga pagsalig kanako isip sa kalihim sa (DepEd),” matud pa sa Bise-Presidente.
Gipaabot sa Bise-Presidente ngadto kang Presidente Marcos ang iyang pagpasalamat sa usa ka bukas nga pamahayag.
“Makasalig ka nga ang DepEd, nga gilangkoban sa mga magtutudlo ug non-teaching personnel, magpadayon nga moalagad nga tinuoray alang sa kaugman sa matag tinu-an,” panapos sa hamubo nga pamahayag.
Gipubliko ni Bise Presidente Duterte ang iyang pagpasalamat isip tubag sa pamahayag sa Presidente nga di makaapekto sa ilang opisyal nga relasyon ang pagpagawas sa gibati ni Unang Ginang Liza Marcos nga “bad shot” kaniya ang ikaduhang taas nga opisyal.
Sa hamubo nga pamahayag mahitungod sa mga pamahayag sa Unang Ginang nga wa na kini mahimuot kaniya, nagkanayon si Bise-Presidente Duterte nga wa kini labut sa iyang mandato isip usa ka opisyal sa kagamhanan.
“Mga kaigsuonan, nag-atubang ang atong nasud og dagkong mga problema nga kinahanglang solusyonan sa gobyerno,” sumala pa sa Bise-Presidente sa iyang pamahayag.
Dugang pa niya, angayan nga maoy tutokan ang pagtubag sa mga suliran nga giatubang sa nasud.
Isip tubag sa maong pamahayag, giklaro usab ni Presidente Marcos nga di ilisan ang Bise-Presidente isip kalihim sa DepEd taliwala sa panawagan ni Kongresista Joel Chua sa ikatulong distrito sa Manila nga angay nang mokanaug sa iyang pwesto sa kabinete si Bise-Presidente Inday.
Ubos kang Bise-Presidente Duterte, ang Deped maoy labing kasaligan ug gikauyonan nga ahensya sa administrasyong Marcos. Kini samtang ang Bise-Presidente usab nakakuha sa kinatas-ang pagsalig ug pag-ayon sa mga taas nga opisyal sa nasud.
